Xocalı faciəsi qurbanlarının xatirəsi Qarabağ bölgəsində dərin hüznlə yad edilib
Ağdam, 26 fevral, Tahir Ağaməmmədov, AZƏRTAC
XX əsrin ən dəhşətli hadisələrindən olan Xocalı faciəsinin 24-cü ildönümü Qarabağ bölgəsində dərin hüznlə yad edilib.
AZƏRTAC xəbər verir ki, faciənin ildönümü ilə bağlı fevralın 26-da dövlət bayraqları endirilib, müxtəlif tədbirlər, sərgilər, anım mərasimləri keçirilib, Xocalı faciəsi qurbanlarının xatirəsi ehtiramla anılıb.
Ağdam rayon rəhbərliyi, ziyalılar, ictimaiyyət nümayəndələri, Qarabağ müharibəsi veteranları, gənclər və ağsaqqallar əvvəlcə rayonun girişindəki Şəhidlər abidə-kompleksi önünə tər qərənfillər düzərək, Xocalıda həlak olanların ruhuna dualar oxuyublar.
Quzanlı qəsəbəsindəki Ağdam Dövlət Dram Teatrında davam edən tədbir Xocalı faciəsi zamanı şəhid olmuş soydaşlarımızın xatirəsinin bir dəqiqəlik sükutla yad edilməsi ilə başlanıb.
Tədbirdə çıxış edənlər erməni silahlı qüvvələri tərəfindən Xocalı şəhərində törədilən qırğının acı nəticələrindən danışıblar. Bildirilib ki, həmin gün 613 nəfər, o cümlədən 106 qadın, 63 uşaq, 70 qoca xüsusi amansızlıqla qətlə yetirilib. 8 ailə tamamilə məhv edilib, 25 uşaq hər iki valideynini, 130 uşaq isə valideynlərdən birini itirib, 487 nəfər, o cümlədən 76 uşaq ağır yaralanıb, 1275 nəfər girov götürülüb, 150 nəfər itkin düşüb.
Mərasimdə çıxış edən Xocalı sakinləri erməni silahlılarının törətdikləri qanlı cinayətlərdən, günahsız insanların başına gətirdikləri müsibətlərdən bəhs ediblər.
Tədbirin sonunda Ağdam Dövlət Dram Teatrının hazırladığı “Ürəyində arzu tut” tamaşası göstərilib.
Xocalıdan olan məcburi köçkünlərə ərzaq yardımı edilib.
X X X
Xocalı faciəsinin 24-cü ildönümü münasibətilə Ağcabədi şəhərindəki Şəhidlər xiyabanında ümumrayon anım mərasimi keçirilib. Rayon ictimaiyyətinin nümayəndələri, əmək kollektivləri, gənclər, Qarabağ müharibəsi veteranları, N hərbi hissənin əsgərləri Azərbaycanın ərazi bütövlüyü uğrunda canlarından keçmiş Vətən övladlarının məzarları üstünə tər çiçəklər düzüb, şəhidlərin ruhuna dualar oxunub.
AZƏRTAC xəbər verir ki, tədbirdə çıxış edənlər 1992-ci il fevralın 25-dən 26-na keçən gecə erməni hərbi hissələrinin keçmiş sovet ordusunun Xankəndidəki 366-cı motoatıcı alayının hərbi texnikasının köməyi ilə Xocalıda dinc, günahsız insanlara qarşı törədikləri kütləvi qırğın, ağır cinayət əməllərindən danışıblar.
Sonra ədəbi-bədii kompozisiya göstərilib.
Həmin gün Ağcabədi şəhərindəki Heydər Əliyev adına meydanda rayon məktəblilərinin Xocalı faciəsinə həsr etdikləri müxtəlif əl işləri və rəsmlər nümayiş olunub.
X X X
Xocalı soyqırımının ildönümü Füzuli rayonunda da silsilə tədbirlərlə qeyd edilib. Rayonun idarə və müəssisələrində, ümumtəhsil məktəblərində, mədəniyyət ocaqlarında, qəsəbə və kəndlərdə anma mərasimləri, xatirə gecələri keçirilib, sərgi və guşələr təşkil olunub.
AZƏRTAC xəbər verir ki, Horadiz şəhərindəki Qəhrəmanlar parkında keçirilən ümumrayon tədbirində çıxış edənlər erməni millətçilərinin keçmiş SSRİ-nin 366-cı motoatıcı alayının köməyi ilə 1992-ci il fevralın 25-dən 26-na keçən gecə Xocalıda törətdikləri qırğının acı nəticələri barədə danışıb, baş verənləri bütün bəşəriyyətə, insanlığa qarşı törədilən qanlı cinayət adlandırıblar.
Bildirilib ki, bu faciəyə ilk dəfə hüquqi-siyasi qiymət ümummilli lider Heydər Əliyev tərəfindən verilib. 1994-cü il fevralın 24-də Azərbaycan Respublikasının Milli Məclisi “Xocalı soyqırımı günü haqqında” qərar qəbul edib, BMT-yə, dünya dövlətlərinə bu qətliamın gerçək mahiyyətini açıqlayaraq, beynəlxalq ictimaiyyəti erməni terrorizminə qarşı təsirli tədbirlər görməyə çağırıb.
Çıxışlarda Xocalı həqiqətlərinin dünya ictimaiyyətinə çatdırılması, həmçinin bu faciəyə obyektiv qiymət verilməsi istiqamətində Heydər Əliyev Fondunun fəaliyyəti xüsusilə vurğulanıb, Fondun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq kampaniyası çərçivəsində görülən işlər yüksək qiymətləndirilib.
X X X
XX əsrin ən dəhşətli faciələrindən olan Xocalı faciəsi qurbanlarının xatirəsi respublikamızın hər yerində olduğu kimi, Tərtər rayonunda da dərin hüznlə anılıb. Rayon rəhbərliyi, ağsaqqallar, gənclər, ziyalılar, müharibə veteranları, əmək kollektivlərinin nümayəndələri və Xocalıdan olan məcburi köçkünlər “Şəhidlər” abidəsi önünə gül dəstələri düzərək faciə qurbanlarının xatirəsini ehtiramla yad edib, məktəblilərin Xocalı faciəsinə həsr etdikləri rəsm sərgisinə baxıblar.
AZƏRTAC xəbər verir ki, Gənclər Mərkəzində davam edən tədbirdə çıxış edənlər erməni silahlı qüvvələrinin keçmiş SSRİ-nin 366-cı motoatıcı alayının köməyi ilə 1992-ci il fevralın 25-dən 26-na keçən gecə Xocalı şəhərində törətdikləri qırğından, dinc əhaliyə amansız divan tutulmasından danışıblar. Bildirilib ki, Xocalı faciəsi tarixin yaddaşlardan heç vaxt silinməyən Xatın, Holokost, Sonqmi, Ruanda və Srebrenitsa kimi dəhşətli faciələrdən heç də geri qalmır. Bu faciə tək xocalılılara qarşı deyil, türk dünyasına, bütün bəşəriyyətə qarşı yönəldilmiş vəhşilik aktıdır.
Sonra rayon mədəniyyət evinin hazırladığı “Xocalım, ay Xocalım” adlı kompozisiya nümayiş etdirilib.
Tədbirin sonunda rayonda məskunlaşmış Xocalı sakinlərinə rayon icra hakimiyyəti tərəfindən ərzaq yardımı, “Xocalı fəryadı” mövzusunda rayon məktəbliləri arasında keçirilən inşa yazı və rəsm müsabiqələrinin qaliblərinə diplomlar verilib.
Bölmənin digər xəbərləri
