Xocalı soyqırımı təkcə Azərbaycan xalqına deyil, bəşəriyyətə qarşı törədilmiş ən dəhşətli cinayətdir
Bakı, 23 fevral, AZƏRTAC
Fevralın 23-də Nəsimi Rayon İcra Hakimiyyətinin və YAP Nəsimi rayon təşkilatının birgə təşkilatçılığı ilə Xocalı soyqırımının 23-cü ildönümünə həsr olunan tədbir keçirilib.
AZƏRTAC xəbər verir ki, əvvəlcə Xocalı soyqırımı qurbanlarının xatirəsi bir dəqiqəlik sükutla yad edilib, faciədən bəhs edən ədəbi-bədii kompozisiya göstərilib.
Nəsimi Rayon İcra Hakimiyyətinin başçısı Nəsib Məhəməliyev 1992-ci ilin fevralında Xocalıda baş vermiş dəhşətli hadisələrdən danışıb. O, insanlığa qarşı bu kimi cinayətlərin cəzasız qalmamasının zəruriliyini vurğulayıb. Bildirilib ki, XX əsrin ən dəhşətli faciələrindən olan Xocalı soyqırımından 23 il keçir. Xocalıda baş vermiş faciə iki yüz ilə yaxın müddətdə erməni millətçilərinin azərbaycanlılara qarşı müntəzəm olaraq həyata keçirdikləri etnik təmizləmə və soyqırımı siyasətinin ən qanlı səhifəsidir. Bu, erməni faşistlərinin mifik, tarixdə izi-tozu olmayan “Böyük Ermənistan” ideyasını həyata keçirmək məqsədilə törətdikləri minlərlə cinayətdən ən dəhşətlisi idi. Azərbaycan xalqı Xocalı faciəsinin günahsız qurbanlarının xatirəsini həmişə əziz tutur. Əminik ki, tezliklə doğma Qarabağımız mənfur düşmənin əsirliyindən azad olunacaq və bütün şəhidlərimizin qisası alınacaq.
Yeni Azərbaycan Partiyası Nəsimi rayon təşkilatının sədri, Milli Məclisin deputatı Məlahət İbrahimqızı Ermənistan silahlı qüvvələrinin törətdiyi Xocalı soyqırımının təkcə Azərbaycan xalqına deyil, bəşəriyyətə qarşı ən dəhşətli cinayət olduğunu vurğulayıb. Bildirilib ki, Xocalı faciəsini erməni quldurları ona görə törətmişlər ki, xalqı qorxudaraq min illərlə yaşadıqları torpaqları tərk etməyə məcbur etsinlər. Lakin Azərbaycan xalqı öz torpağını mərdliklə müdafiə edərək minlərlə şəhid verib. Xocalı soyqırımını unutmağa heç bir azərbaycanlının haqqı yoxdur.
Tədbirdə YAP Nəsimi rayon təşkilatının və Nəsimi Rayon İcra Hakimiyyətinin birgə keçirdiyi Xocalı soyqırımına həsr edilmiş “Justice for Khojaly” adlı fləşmobun təqdimatı olub. Bildirilib ki, fləşmobun məqsədi Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq təşviqat kampaniyasına dəstək olaraq Xocalı həqiqətlərini sosial şəbəkələr vasitəsi ilə dünya ictimaiyyətinə çatdırmaqdır. Fləşmobda YAP Nəsimi rayon təşkilatının 1500-ə yaxın fəal gənci iştirak edib.
Bölmənin digər xəbərləri
