Xocalı soyqırımının 27-ci ildönümü ilə əlaqədar Dubayda tədbir keçirilib
Əbu-Dabi, 25 fevral, AZƏRTAC
Dubay şəhərində Azərbaycan Respublikasının Birləşmiş Ərəb Əmirliklərindəki səfirliyi və ölkəmizin baş konsulluğunun birgə təşkilatçılığı ilə Xocalı soyqırımının 27-ci ildönümünə həsr olunmuş anım mərasimi keçirilib.
AZƏRTAC xəbər verir ki, tədbirdə diplomatlar, Dubayda və Əbu-Dabidə yaşayan həmvətənlərimiz, habelə ziyalılar və ictimaiyyət nümayəndələri iştirak ediblər.
Tədbirin əvvəlində Xocalı faciəsi qurbanlarının və Azərbaycanın ərazi bütövlüyü uğrunda canlarını fəda edən şəhidlərimizin xatirəsi bir dəqiqəlik sükutla yad olunub.
Baş konsulluğun əməkdaşı Tamerlan Qarayev çıxış edərək Xocalı soyqırımı və bu qanlı faciə qurbanlarının xatirəsinin hər il Azərbaycanda və digər ölkələrdə ehtiramla yad edildiyini bildirib.
Baş konsulluğun əməkdaşı Emin Hüseynov qeyd edib ki, Xocalı soyqırımı XX əsrin insanlıq əleyhinə yönəlmiş ən amansız cinayətlərindən, ən qəddar terror aktlarından biridir. Bildirib ki, 1992-ci ilin 26 fevral tarixində Xocalıda baş vermiş qırğın erməni millətçi-şovinistlərinin və onların havadarlarının Azərbaycan xalqına qarşı apardıqları işğalçılıq, etnik təmizləmə və soyqırımı siyasətinin davamı idi. Bu hadisələrin təfsilatından bəhs edən diplomat deyib ki, 1994-cü ildə ulu öndər Heydər Əliyevin təşəbbüsü ilə Azərbaycan parlamenti 26 fevralı Xocalı soyqırımı günü kimi elan edib.
Diplomat vurğulayıb ki, Prezident İlham Əliyevin apardığı məqsədyönlü siyasətin nəticəsində artıq 14 dövlətin - Pakistan, Meksika, Kolumbiya, Sudan, Peru, İordaniya, Honduras, Panama, Rumıniya, Cibuti, Çex Respublikası, Bosniya və Herseqovina, Qvatemala və Şotlandiyanın qanunverici orqanları və ABŞ-ın 22 ştatı Xocalı soyqırımını rəsmi qaydada tanıyıb.
Azərbaycanlı diplomat diqqətə çatdırıb ki, Ermənistanın ölkəmizə qarşı təcavüzü ilə bağlı həqiqətlərin dünya ictimaiyyətinə çatdırılmasında Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın böyük xidmətləri var.
“Ermənistanın törətdiyi Xocalı soyqırımının dünya ictimaiyyətinə çatdırılması istiqamətində Heydər Əliyev Fondunun vitse-prezidenti Leyla Əliyevanın təşəbbüsü ilə 2008-ci il mayın 8-də Şuşanın işğalının ildönümündə irəli sürülmüş “Xocalıya ədalət!” kampaniyası hazırda 80-dən artıq ölkədə uğurla davam etdirilməkdədir. Kampaniyanın məqsədi beynəlxalq ictimaiyyətin Xocalı faciəsi ilə bağlı məlumatlandırılması, faciəyə beynəlxalq aləmdə siyasi-hüquqi və mənəvi qiymət verilməsi və həmçinin beynəlxalq səviyyədə anılmasını təmin etməkdir”, - deyə diplomat söyləyib.
Türkiyənin Dubaydakı konsulu İlker Kılıç Xocalı faciəsinin qardaş ölkənin ortaq kədəri olduğunu qeyd edib, Xocalıda baş vermiş zülmün heç vaxt ürəklərdən silinməyəcəyini diqqətə çatdırıb.
Sonra Heydər Əliyev Fondu tərəfindən hazırlanmış “Khojaly Genocide” adlı sənədli film nümayiş etdirilib.
Tədbir iştirakçıları “Xocalı soyqırımı” adlı fotosərgiyə baxıblar.
Sonda iştirakçılara Qarabağ münaqişəsi və Xocalı soyqırımı haqqında məlumatların yer aldığı kitablar paylanılıb.
Asya Hacızadə
AZƏRTAC-ın xüsusi müxbiri
Əbu-Dabi
Bölmənin digər xəbərləri
