Xocalının müdafiəçiləri qəddar düşmənlə mübarizədə qəhrəmanlıqla vuruşublar
Bakı, 26 fevral, AZƏRTAC
Xocalı faciəsinin 24-cü ildönümü ilə əlaqədar Silahlı Qüvvələrdə silsilə tədbirlər keçirilir.
Müdafiə Nazirliyinin mətbuat xidmətindən AZƏRTAC-a bildiriblər ki, cəbhə bölgələrindəki hərbi hissələrdən birində keçirilən tədbirdə Xocalı şəhidlərinin, eləcə də Azərbaycanın ərazi bütövlüyü, müstəqilliyi uğrunda şəhid olanların xatirəsi bir dəqiqəlik sükutla yad edilib, dövlət himni ifa olunub.
Müdafiə Nazirliyinin zabiti, polkovnik Abdulla Qurbani çıxış edərək erməni millətçilərinin Xocalı soyqırımını törətməklə məkrli məqsədlər güddüyünü, xalqımızı qorxutmaq, vahimə yaratmaq, onun mübarizə əzmini qırmaq, torpaqların işğalı faktı ilə barışmağa məcbur etmək niyyətində olduqlarını nəzərə çatdırıb. Qeyd edilib ki, hiyləgər və amansız düşmən öz məqsədlərinə çata bilməyib. Xocalının müdafiəçiləri qəddar düşmənlə mübarizədə qəhrəmanlıqla vuruşub, Vətənə sədaqət nümunəsi göstərərək şəhidlik zirvəsinə ucalıblar.
Bu gün qarşımızda duran əsas vəzifə Xocalı soyqırımının qurbanlarını hörmət və ehtiramla yad etmək, bu faciəni dünyaya tanıtmaq, Xocalıya ədalət tələb etməklə yanaşı, işğal altındakı əzəli və əbədi torpaqlarımızı düşmən tapdağından azad etməkdir. Bunun üçün də hər bir əsgər və zabit Vətənə, xalqa, dövlətə sədaqətlə xidmət etməli, ona həvalə edilmiş döyüş texnikalarını və silahları dərindən öyrənməli, işğal altında olan torpaqlarımızın azadlığı naminə müqəddəs savaşa hər an hazır olmalıdır.
Zabitlər - polkovnik-leytenant Musa Teymurov və mayor Namiq Cavadov bildiriblər ki, düşmənlərimiz hələ də “Böyük Hayastan dövləti” yaratmaq xülyasından əl çəkməyib, torpaqlarımızdan çıxmaq istəmir, qan tökməkdən usanmır, beynəlxalq hüquqa məhəl qoymur, dünyanın nüfuzlu təşkilatlarının tələblərini yerinə yetirmirlər. Yenə də hər gün atəşkəs rejimi pozulur, Ermənistan silahlı bölmələri mövqelərimizi intensiv olaraq atəşə tutur, təxribatlar törədirlər. Lakin buna baxmayaraq, düşmənə layiqli cavab verilir, şəhidlərimizin intiqamı on qat artıq alınır və bundan sonra da alınacaq. Hər bir əsgər və zabit tarix boyu xalqımızın başına gətirilən soyqırımı və faciələrdən nəticə çıxarır, Azərbaycanın ərazi bütövlüyünü təmin etmək naminə Ali Baş Komandanın əmrlərinə hər an hazırdırlar.
Respublikanın Əməkdar mədəniyyət işçisi Vaqif Vəliyevin rəhbərlik etdiyi Füzuli Dövlət Dram Teatrı aktyorlarının ifasında təqdim edilən “Şəhid şəhər Xocalı” adlı rekviyem-tamaşa şəxsi heyət tərəfindən böyük həyəcanla izlənilib. Bu tamaşa Vətənin hər bir əsgərini Xocalı şəhidlərinin qisasını almağa, Azərbaycanın ərazi bütövlüyünü tezliklə təmin etməyə daha da ruhlandırıb.
Bölmənin digər xəbərləri
