Xocavənd sakini: İllərlə çəkdiyimiz həsrətə son qoyuldu
Xocavənd, 31 mart, AZƏRTAC
Bu gün çox sevinirəm ki, öz doğma elimizə, ata-baba torpağımıza qayıtmışıq. Bu sevincimizin əsas səbəbkarı bizim qüdrətli ordumuzdur. Biz bu torpaqlar uğrunda canından keçən şəhidlərimizin sayəsində bu gün burada dayanmışıq.
AZƏRTAC-ın bölgə müxbiri xəbər verir ki, bunu bu gün növbəti köç karvanı ilə Xocavəndə qayıdan keçmiş məcburi köçkün Amil Muradov bildirib.
“Buradan çıxanda 36 yaşım var idi, bu gün isə doğma yurduma 70 yaşımda ailəmlə, övladlarımla, nəvələrimlə birlikdə qayıtmışam. İllərlə çəkdiyimiz həsrətə son qoyuldu. Bu, sözlə ifadə olunmayacaq qədər əvəzedilməz bir duyğudur. Biz bu yerlərin çox həsrətini çəkmişik. Bu torpağın hər qarışı bizim üçün doğmadır, müqəddəsdir. Burada bizə verilən evlər də çox gözəldir. Yüksək səviyyədə təmir-bərpa işləri aparılıb. Biz 4 otaqlı evlə təmin olunmuşuq və evdə hər cür şərait yaradılıb.
Ali Baş Komandan İlham Əliyevə təşəkkürümüzü bildiririk. Azərbaycan Ordusu onun rəhbərliyi ilə tarix yazaraq torpaqlarımızı işğaldan azad etdi. Yurd yerlərimizdə çox qısa zamanda həyat yenidən dirçəldi. Qarabağda artıq yenidən xoşbəxt günlər, firavan həyat başlayıb”, - deyə Amil Muradov söyləyib.
Qeyd edək ki, “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”na əsasən, bu gün Xocavənd şəhərinə növbəti köç prosesi gerçəkləşib, yola salınan ailələr öz yurdlarına qovuşublar. Bu mərhələdə Xocavənd şəhəri 64 ailə olmaqla, 253 nəfərə qucaq açıb. Bununla da Xocavənd şəhərində 201 ailə olmaqla, 762 nəfərin məskunlaşması təmin edilib. Şəhərdə sakinlərin məskunlaşması üçün lazımi şərait yaradılıb. Yollar abadlaşdırılıb, evlər və infrastruktur bərpa edilib.
Müxbir - Aydın Yavərzadə
Bölmənin digər xəbərləri
