ELM VƏ TƏHSİL
XX əsr Çin ədəbiyyatının ictimai-siyasi həyatla əlaqəsinə həsr edilmiş elmi seminar
![XX əsr Çin ədəbiyyatının ictimai-siyasi həyatla əlaqəsinə həsr edilmiş elmi seminar](/files/2024/2/1200x630/17168094915390550273_1200x630.jpg)
Bakı, 27 may, AZƏRTAC
AMEA Nizami Gəncəvi adına Ədəbiyyat İnstitutunun Azərbaycan-Asiya ədəbi əlaqələri şöbəsində XX əsr Çin ədəbiyyatının formalaşmasında böyük əhəmiyyət kəsb edən inqilabi hadisələrlə ədəbiyyatın qarşılıqlı əlaqəsinə həsr edilmiş seminar keçirilib.
İnstitutdan AZƏRTAC-a bildirilib ki, seminarda şöbə müdiri professor Bədirxan Əhmədli ədəbiyyatın ictimai-siyasi hadisələrin gedişatına olan təsirindən, hər bir xalqın tarixində ədəbiyyatın rolundan danışıb. Çin ədəbiyyatının tanıdılması və öyrənilməsi, tərcümə və nəşr probleminə də toxunan alim müasir ədəbiyyat xadimlərinin, Nobel mükafatı qaliblərinin əsərlərinin nəşri və tanıdılmasının vacibliyini vurğulayıb.
Seminarda şöbənin əməkdaşı Nərmin Cahangirova Çində XX əsr inqilabları və onların ədəbiyyata təsirindən bəhs edən məruzəsi dinlənilib. Məruzədə Çin ədəbiyyatının XX əsrə qədər daha çox saray ədəbiyyatı, müəyyən təbəqələrə müraciət edən, yalnız xoşbəxt gənclər və ailələr haqqında yazılan, əxlaq dərsləri ilə zəngin ədəbiyyat olmasından bəhs edilib, əsrlər boyu nə formaca, nə də ideyaca dəyişməməsinə toxunulub. Həmçinin XX yüzillikdə Çin tarixində bir çox hadisələrin və yeniliklərin baş verməsi, ədəbiyyatın ictimai-siyasi hadisələrlə qarşılıqlı təsirindən danışılıb.
Məruzəçi ənənə və müasirlik meyillərinin mübarizəsini Lu Sin, Lao Şı, Qo Mojo, Ba Jin kimi bir sıra yazarların əsərləri əsasında izah edib. O, Çin ədəbiyyatının təsirləndiyi başqa bir dövr - “Mədəni inqilab” mərhələsinə də nəzər salıb. Bildirib ki, 1966-1976-cı illəri əhatə edən bu mərhələdə daha çox sosialist düşüncə üstün olub. Eyni zamanda, məruzəçi bu mərhələdə köhnə Çin ədəbiyyatına xas olan, lakin 4 May Hərəkatının ədəbi prinsiplərinə yad olan sxematik süjet və personajların şərtiliyi, fərdi üslubdan imtina, oxucunu əyləndirmək istəyi kimi bir çox xüsusiyyətlərin yenidən canlandırılması məsələlərini konkret nümunələrlə şöbə əməkdaşlarının diqqətinə çatdırıb.