YAP-ın qəbul etdiyi qərarlar ölkəmizin daha sürətli inkişafına xidmət edir
Bakı, 18 noyabr, AZƏRTAC
Ölkəmizin ictimai-siyasi həyatında aparıcı rol oynayan, ulu öndər Heydər Əliyevin yaradıcısı olduğu, Prezident İlham Əliyevin rəhbərliyi ilə uğurla inkişaf edən Yeni Azərbaycan Partiyasının təsis olunmasının 30 ili tamam olur. Partiya ölkəmizdə siyasi sabitliyin və davamlı inkişafın təminatçısı kimi çıxış edir. Yeni Azərbaycan Partiyasının fəaliyyət istiqamətlərinə və prinsiplərinə diqqət yetirdikdə onun 30 ildə Azərbaycanın bu günü və gələcəyi naminə gördüyü işlərin aydın mənzərəsi yaranır. Dahi şəxsiyyət Heydər Əliyev Yeni Azərbaycan Partiyasını dünənin, bu günün və gələcəyin partiyası kimi dəyərləndirib. YAP yarandığı gündən “Güclü dövlət, yüksək rifah” prinsipini fəaliyyətinin önündə saxlayır. Ümumiyyətlə, YAP-ın yaranması ilə ölkəmizin həyatında yeni mərhələ başlayıb
AZƏRTAC xəbər verir ki, bu fikirləri Milli Məclisin deputatı Malik Həsənov bildirib.
Malik Həsənov qeyd edib ki, xalqın istəyi, zamanın tələbi ilə yaranan partiyanın 30 ildə keçdiyi inkişaf yolu müasir müstəqil Azərbaycanın uğurlarının təqdimatıdır. “Hər bir dövlətin siyasətinin həyata keçirilməsində hakim partiya mühüm rol oynayır. Ölkənin uğurlarında hakim partiyanın öz payı olur. Bu baxımdan Yeni Azərbaycan Partiyası Azərbaycanın müstəqilliyinin bərpası illərinin bələdçisi olmaqla 1993-cü ildə ulu öndər Heydər Əliyevin xalqın təkidli tələbi ilə hakimiyyətə qayıdışından sonra həyatının mühüm mərhələsinə qədəm qoyub. Bu qayıdış Azərbaycanı həmin illərin xaosundan, anarxiyasından, özbaşınalıqlarından, iqtisadi böhranından xilas etdi, torpaqlarımızın işğalının qarşısını aldı. Ümummilli Lider hakimiyyətə qayıtmasaydı, bu gün müstəqil Azərbaycandan danışmaq qeyri-mümkün idi.
Malik Həsənov bildirib ki, Yeni Azərbaycan Partiyasının irəli sürdüyü təşəbbüslər, qəbul etdiyi qərarlar Azərbaycanın daha sürətli inkişafına, xalqımızın daha yaxşı yaşayışına xidmət edir. Partiyanın hər bir qurultayında qəbul edilən qərarlar ölkəmizin inkişafında mühüm rol oynayıb. Yeni Azərbaycan Partiyası 1992-ci ildə qəbul etdiyi Nizamnaməyə və Proqrama uyğun olaraq 30 ilə yaxın yol qət edib. Bu illər ərzində Proqramda qarşıya qoyduğu bütün hədəflərə nail olub. Uğurlarımızın təməlində dayanan tarixi Zəfərimiz Yeni Azərbaycan Partiyasının VII Qurultayının keçirilməsini bir zərurətə çevirib. Azərbaycan bu Zəfəri ilə yeni reallıqlar yaratdı. Bu reallıqlar hər bir sahədə yeniliklərə, təkmilləşməyə yol açdı. Yeni Azərbaycan Partiyasının VII qurultayında “Bu gün Yeni Azərbaycan Partiyasının VII qurultayının keçirilməsinin zərurəti məhz bu səbəblərdən doğur” söyləyən dövlətimizin başçısı, Yeni Azərbaycan Partiyasının Sədri İlham Əliyev dedi: “Yeni bir vəziyyət yaranmışdır, bu vəziyyəti biz yaratmışıq. Biz reallıqları yaradan ölkəyik. Bundan əvvəlki dövrlərdə də bizim təşəbbüslərimizlə reallaşan bir çox layihələr bölgəyə yenilik gətirdi, əməkdaşlığın yeni formatlarını şərtləndirdi. İkinci Qarabağ müharibəsinin nəticələri də bölgə üçün yeni reallıqlar yaratmışdır. Bölgədə yeni əməkdaşlıq imkanları yaranmışdır”.
“Azərbaycan bütün işləri ardıcıllıqla edir. Qarşıya hədəflər qoyulur və düşünülmüş, gələcəyə hesablanmış siyasətimiz nəticəsində bu hədəflərə zamanında, yüksək səviyyədə nail oluruq. Reallığa çevrilən hədəflər yeni məqsədlərin müəyyənləşdirilməsində stimulverici amil rolunu oynayır. Bu hədəflərə çatmaqla Azərbaycanın siyasi, iqtisadi sahədə dayanıqlı inkişafı təmin edildi, beynəlxalq aləmdə mövqeyi möhkəmləndi, əsl söz sahibinə çevrildi. Ölkəmizi Qələbəyə aparan Ordumuzun maddi-texniki bazası möhkəmləndirildi. Qarabağ münaqişəsinin həlli üçün möhkəm hüquqi baza yaradıldı. Azərbaycan böyük nüfuza və hörmətə malik olan ölkəyə çevrildi və bu uğurlarımız əsasında ərazi bütövlüyümüz bərpa edildi. Müzəffər Ali Baş Komandan İlham Əliyevin rəhbərliyi ilə rəşadətli Ordumuz tarix yazdı. Zəfər tariximiz yeni reallıqlar yaratmaqla yanaşı, hədəfləri müəyyənləşdirməyi bir tələbə çevirdi”,- deyə Malik Həsənov bildirib.
Milli Məclisin deputatı qeyd edib ki, tarixi Zəfərimizin reallıqları əsasında VII Qurultayını keçirən Yeni Azərbaycan Partiyasının həyatında yeni dövr başlayıb. Partiyanın VII Qurultayında yeni tərkib formalaşıb. Veteranlar Şurası yaradılıb. Gənclərin dinamizmi ilə yaşlı nəslin təcrübəsi arasında vəhdətin yaradılması qarşıya mühüm vəzifə kimi qoyulub. Partiyanın yeni Nizamnaməsi qəbul olunub. Dövlətimizin başçısı İlham Əliyev VII Qurultayda yeni reallıqlar əsasında partiyanın yeni Proqramının hazırlanmasının və təsdiqinin vacibliyini bildirib. Ötən ilin sonunda 5 fəsildən ibarət olan yeni Proqram YAP İdarə Heyətinin qərarı əsasında təsdiqlənib. “Biz birlikdə güclüyük!” devizini özündə əks etdirən Proqramda postmünaqişə dövrünün reallıqları, görüləcək işlər öz əksini tapıb. 30 illik yubileyini yeni reallıqları özündə ifadə edən yeni Proqramı, Nizamnaməsi əsasında qeyd edən Yeni Azərbaycan Partiyasının qarşıdakı dövrdə görüləcək işləri sırasında hazırda işğaldan azad edilmiş ərazilərimizdə başlayan və geniş miqyas alan bərpa-quruculuq işlərini daha da sürətləndirmək, Böyük Qayıdışın tam şəkildə reallığa çevrilməsinə nail olmaq dayanır.
Partiya çox zəngin və şərəfli yol keçdiyini söyləyən Malik Həsənov bildirib ki, Prezident, Yeni Azərbaycan Partiyasının Sədri İlham Əliyevin böyük əminliklə və inamla qeyd etdiyi kimi, YAP bundan sonra da ölkəmizdə gedən bütün proseslərin mərkəzində olacaq.
Bölmənin digər xəbərləri
