DÜNYA
YAPONİYA ALİMLƏRİ MİNİATÜR ÜRƏK ƏZƏLƏSİ YARATMIŞLAR
Yaponlar elektromaqnit sahəsinin təsiri ilə yığılıb-açılan miniatür ürək əzələsi yaratmışlar. Toxoku Universiteti alimlərinin hazırladıqları süni orqanının çəkisi cəmi 20 qramdır.
Xüsusi xəlitədən hazırlanmış, uzunluğu 8, eni isə 1 santimetr olan bu orqan ensiz lövhə şəklindədir. Onun üstünü örtən yarımkeçirici maddə əzələni dəqiqədə 60 dəfə yığılmağa məcbur edir. Bu süni orqan lazım olan enerjini elektro maqnit dalğaları vasitəsilə xarici enerji qurğusundan alır.
Mütəxəssislərin fikrincə, cihaz ürək çatışmazlığından əziyyət çəkən və əlavə köməkçi qurğulara ehtiyacı olan çoxsaylı xəstələri xilas etməyə qadirdir.
Hazırda zəifləmiş orqana qan vurmağa kömək edən xüsusi nasoslar tətbiq edilir. Bu yaxınlarda isə amerikalılar süni ürək yaratmışlar. Lakin yapon alimlərinin fikrincə, onun bir sıra qüsurları vardır. Məsələn, nasoslarda qanın laxtalanması baş verə bilər, çəkisi 1 kiloqramdan artıq olan süni ürək isə insan üçün çox ağırdır. Toxoku Universitetindən olan həkimlər inandırmağa çalışırlar ki, onların yaratdıqları süni ürək əzələsi yüngül və kiçik ölçülü olduğu üçün belə problemlər meydana çıxmır.
İTAR-TASS-ın verdiyi xəbərə görə, alimlər süni əzələni əvvəlcə ürəyinin həcmi insanınkına uyğun gələn keçilərdə yoxlamaq, sonra isə insanlar üzərində kliniki sınaqdan keçirməyə hazırlaşırlar.