DÜNYA
YAPONİYA SAHİLLƏRİNDƏ YENİ TEKTONİK LAY AŞKAR EDİLMİŞDİR
İTAR-TASS-ın verdiyi xəbərə görə, Yaponiyanın Sakit okean sahillərində uzunluğu təxminən 100 kilometr olan naməlum tektonik lay aşkar edilmişdir. Alimlərin fikrincə, bu lay hər 100-150 ildən bir təkrar olunan dağıdıcı zəlzələlərin mənbəyidir. Tektonik lay tez-tez güclü sunamilərin baş verdiyi Kii yarımadasının yanından keçir. 1944-cü ildə yeraltı təkanlar nəticəsində baş vermiş təbii fəlakət 1,2 min adamın həyatına son qoymuşdur.
Mütəxəssislər bu rayondakı seysmik təhlükənin səbəblərini aydınlaşdırmaq qərarına gələrək, səs dalğalarının köməyi ilə okeanın təkini tədqiq etmişlər. Əldə edilmiş nəticələrə görə, yeni lay okeanın təkində 10 kilometr dərinlikdə kontinental Avrasiya platforması ilə onun altından keçən Filippin platformasının qovuşduğu yerdən başlanır. Onun dar zolağı qitə plitəsinə paz şəklində daxil olaraq, onu iti bucaq altında kəsir və təxminən 2,5 min metr dərinlikdə Nankay silsiləsi yaxınlığında dəniz təkinin səthinə çıxır.
Alimlər hesab edirlər ki, tektonik lay Avrasiya və Filippin plitələrinin hərəkəti nəticəsində yaranan seysmik fəallığı gücləndirir. Onların fikrincə, 1944-cü ildəki zəlzələnin baş verməsi üçün bu “pazın” cəmi 1-5 metr tərpənməsi kifayətdir.