Yaponiya şirkətinin investisiya yatırımı ilə Zaqatalada tütünqurutma məntəqəsi inşa edilib
Zaqatala, 12 iyul, Mustafa Dadaşov, AZƏRTAC
Azərbaycanda əsasən kənd təsərrüfatı üzrə layihələrə imza atan Yaponiyanın “Tet İnternational Development” şirkəti tərəfindən Zaqatala rayonunda yeni tütünqurutma məntəqəsinin tikintisi işləri başa çatdırılıb. İyulun 12-də şirkətin törəmə müəssisəsi olan “Zaqatala AGRO İndustry” MMC-nin tütünqurutma məntəqəsinin rəsmi açılış mərasimi olub. Tədbirdə “Tet İnternational Development” MMC-nin, Kənd Təsərrüfatı Nazirliyinin, Zaqatala Rayon İcra Hakimiyyətinin, KOBİA-nın nümayəndələri, fermerlər iştirak ediblər.
AZƏRTAC-ın bölgə müxbiri xəbər verir ki, tədbiri rayon icra hakimiyyəti başçısının müavini, sosial-iqtisadi inkişafın təhlili və proqnozlaşdırılması şöbəsinin müdiri İlkin Şəfizadə açaraq, kənd təsərrüfatının yüksək əməktutumlu və gəlirli sahələrindən olan tütünçülüyün inkişafına son illər dövlət tərəfindən xüsusi diqqət və qayğı göstərildiyini bildirib, Zaqatala rayonunun tütünçülük ənənələrindən söz açıb. Qurum rəsmisi Yaponiya şirkəti ilə əməkdaşlığın gələcəkdə digər sahələrdə də uğurla davam etdiriləcəyinə əminliyini ifadə edib.
Kənd Təsərrüfatı Nazirliyinin Aparat rəhbəri Rəfail Quliyev çıxışında “Azərbaycan Respublikasında tütünçülüyün inkişafına dair 2017-2021-ci illər üçün Dövlət Proqramı”nın icrası ilə bağlı görülən işlərdən bəhs edib.
Tədbirdə kənd təsərrüfatı nazirinin müşaviri Şöhrət Vəkilov, Kiçik və Orta Biznesin İnkişafı Agentliyinin (KOBİA) Qəbələ-Oğuz üzrə nümayəndəsi Ruslan Qarayev, Azərbaycan Sahibkarlar Konfederasiyasının və digər qurumların təmsilçiləri çıxış edərək “Zaqatala AGRO İndustry” MMC-nin fəaliyyətinə uğurlar arzulayıblar.
“Tet İnternational Development” MMC-nin səhmdarı və prezidenti Savada Taro çıxış edərək, şirkətin Azərbaycandakı fəaliyyəti və Zaqatalada gördüyü işlər barədə məlumat verib.
Bildirilib ki, şirkət iki-üç il ərzində Azərbaycana tütünçülüyün inkişafı üçün 10 milyon ABŞ dolları həcmində investisiya yatırıb. Şirkət tərəfindən Zaqatala rayonunda emal müəssisəsinin tikintisinə 2021-ci ilin yanvarında başlanılıb. Məntəqədə 120 tütünqurutma kamerası quraşdırılıb. Tütün istehsalı ilə bağlı bu il Zaqatala və Qax rayonlarında 53 fermerlə müqavilə bağlanılıb, onlara şitil yetişdirmək üçün pulsuz toxum verilib. Eyni zamanda, fermerləri tütün şitilləri ilə təmin etmək üçün məntəqənin özündə də ümumi sahəsi 12 min 256 kvadratmetr olan 48 ədəd istixana quraşdırılıb.
Diqqətə çatdırılıb ki, şirkət tərəfindən cari ildə Zaqatala rayonunda 300, Qaxda isə 365 hektar sahədə “Virciniya botaniki” növlü tütün əkilib. Builki mövsümdə cəmiyyətə məxsus tütün sahələrindən 11 min tonadək yaşıl kütlə yığılması, ondan 1800 ton quru tütün istehsal olunması nəzərdə tutulur. Məhsulun 70 faizi Rusiya, Ukrayna, Belarus, həmçinin Avropa ölkələrinə ixrac ediləcək, 30 faizi daxili bazara çıxarılacaq. Hazırda müəssisədə 61 nəfər işçi çalışır. Tütün yığımı dövründə 150 nəfər mövsümi işlərə cəlb ediləcək.
Bildirilib ki, şirkət 2024-cü ilədək Zaqatala və ətraf rayonlarda tütün əkini sahələrini 1000 hektaradək genişləndirməyi, tütünqurutma kameralarının sayını 200-ə çatdırmağı, mövsüm ərzində tütün sahələrindən 17 min ton yaşıl kütlə tədarük etməyi, ondan 2800 tonadək quru tütün istehsal etməyi planlaşdırır.
Məntəqənin açılışını bildirən qırmızı lent kəsildikdən sonra tədbir iştirakçıları müəssisədə yaradılan şəraitlə tanış olub, yaşıl tütün kütləsinin tütünqurutma kameralarına qoyulması prosesini izləyiblər.
Bölmənin digər xəbərləri
