Yəməndə bombalanan həbsxana binasının dağıntıları altından 123 cəsəd çıxarılıb
Bakı, 3 sentyabr, AZƏRTAC
Yəmənin cənub-qərbindəki Dhamar şəhərində yerləşən həbsxana binası Səudiyyə Ərəbistanının başçılıq etdiyi koalisiya qüvvələri tərəfindən bombalanıb. AZƏRTAC Əl-Cəzirə telekanalının saytına istinadla xəbər verir ki, binanın dağıntıları altından 123 məhkumun cəsədləri çıxarılıb. Şəhəri nəzarətdə saxlayan Hutsi üsyançılarının təmsilçisi bildirib ki, dağıntılar altında qalmış insanların cəsədlərinin axtarılması davam edir.
Bundan başqa, bombardman nəticəsində Dhamar şəhərində 50 nəfərin öldüyü və 100-dən çox insanın da yaralandığı bildirilir. BMT Baş katibinin Yəməndəki xüsusi nümayəndəsi Martin Qriffits şəhərin bombardman edilməsini pisləyib və bu insidenti “faciə” adlandırıb.
Yəməndə 2014-cü ildən bəri şiə husitlərlə Səudiyyə Ərəbistanının başçılıq etdiyi sünni ərəblər arasında döyüşlər son iki ayda daha da qızışıb. BMT-nin məlumatına görə, 2016-cı ildən bu ölkədə 70 mindən çox insan bu silahlı münaqişənin qurbanı olub.
Bölmənin digər xəbərləri
