YENİ DƏRS İLİNDƏ HEYDƏR ƏLİYEV UNİVERSİTETİNİN İLK MƏŞĞƏLƏSİ
Mingəçevirdə fəaliyyət göstərən Heydər Əliyev universitetində yeni dərs ilinin ilk məşğələsi keçirilmişdir.
AZƏRTAC-ın müxbiri xəbər verir ki, universitetin rektoru Məhəbbət Qarabağlı ötən dərs ilinin yekunları və yeni tədris ilində qarşıda duran vəzifələrdən danışmışdır. Dinləyicilər Naxçıvan Muxtar Respublikası Ali Məclisinin 2003-cü ili Heydər Əliyev ili elan etməsi barədə qərarını razılıq hissi ilə qarşılamışlar. Prezident Heydər Əliyevin zəngin elmi-siyasi irsinin, xalqımızın və müstəqil dövlətimizin tərəqqisi naminə titanik fəaliyyətinin daha dərindən öyrənilməsi, izahı və təbliği ilə bağlı konkret tədbirlər planı müəyyən edilmişdir.
Qeyd edilmişdir ki, Dövlət Neft Şirkətinin birinci vitse-prezidenti, Milli Məclisin deputatı, Milli Olimpiya Komitəsinin prezidenti, Heydər Əliyev məktəbinin layiqli yetirməsi İlham Əliyevin Avropa Şurası Parlament Assambleyasının sədr müavini və Büro üzvü seçilməsi mingəçevirlilərdə böyük ruh yüksəkliyi yaratmışdır. Dinləyicilər adından Avropa Şurasının Parlament Assambleyasında Azərbaycan nümayəndə heyətinin rəhbəri İlham Əliyevin adına təbrik məktubu göndərilmişdir.
Sonra “Heydər Əliyevlə xalqın birliyi tarixi qələbələrimizin rəhnidir”, “Heydər Əliyev və milli təhsil quruculuğu” mövzusunda məruzələr dinlənilmişdir.
Bölmənin digər xəbərləri
