YENİ EVİN BÜNÖVRƏSİ QOYULMUŞDUR
Ölkəmizin müstəqilliyi naminə sağlamlığından keçmiş insanlara qayğı və diqqət Azərbaycan Prezidenti Heydər Əliyevin rəhbərliyi ilə aparılan dövlət siyasətinin öncül istiqamətlərindən biridir.
Bu günlərdə Sabunçu rayonunun Bakıxanov qəsəbəsində Qarabağ müharibəsinin əlilləri və şəhid ailələri üçün nəzərdə tutulan dördmərtəbəli yaşayış evinin bünövrəsi qoyulmuşdur. Tikintiyə Əmək və Əhalinin Sosial Müdafiəsi Nazirliyi hamilik edir, maliyyə vəsaitini isə Dövlət Sosial Müdafiə Fondu ayırmışdır. Yeni binada sahəsi 38-70 kvadratmetrlik 36 ikiotaqlı mənzil olacaq, bütün mənzillərə telefon çəkiləcəkdir. Tikinti işlərini nazirliyin elan etdiyi tenderdə qalib gəlmiş yerli firma aparır.
Bu, Əmək və Əhalinin Sosial Müdafiəsi Nazirliyinin himayəsi ilə şəhid ailələri və Qarabağ müharibəsinin əlilləri üçün tikilən doqquzuncu yaşayış evidir. 1997-ci ildən indiyədək nazirlik Gəncə, Sumqayıt, Naxçıvan və Abşeronda 466 mənzil tikdirmişdir.
Tikintini ilin sonunadək başa çatdırmaq, yeni ildə təzə mənzilləri, sahiblərinə təqdim etmək nəzərdə tutulur.
Bölmənin digər xəbərləri
