YOŞKA FİŞER: AMERİKANIN İRAQA ZƏRBƏLƏRİ YAXIN ŞƏRQDƏ BÜTÜN VƏZİYYƏTİ DƏYİŞDİRƏCƏK
Almaniyanın xarici işlər naziri Yoşka Fişer ölkənin jurnalistləri ilə görüşündə demişdir ki, ABŞ İraqa hərbi zərbələr endirsə, bu, Yaxın Şərqdə “tamam başqa” münasibətlər yaranmasına gətirib çıxaracaqdır.
Nazir hesab edir ki, əgər ABŞ Səddam Hüseyn rejiminə zərbə endirməyi hər halda qərara alarsa, onda Yaxın Şərqdə sülh və sabitlik üçün bütün məsuliyyəti öz üzərinə götürməlidir.
ABŞ-ın vitse-prezidenti Riçard Çeyni bazar ertəsi “Xarici müharibələrin veteranları” təşkilatının qurultayında çıxış edərək, Bağdada qarşı dərhal döyüş əməliyyatlarına başlanmasına tərəfdar olduğunu söyləmişdir. İTAR-TASS-ın verdiyi xəbərə görə, AFR kansleri Gerhard Şröder İraqa qarşı “qabaqlayıcı əməliyyat” aparılmasının zəruriliyi barədə bu bəyanatı elə həmin gün ciddi tənqid edərək, əmin olduğunu bildirmişdir ki, Yaxın Şərqə “müharibə yox, sülh gərəkdir”.
Almaniyanın “Elm və siyasət” fondunun eksperti Folker Pertes də demişdir ki, ABŞ-ın İraqa zərbələr endirməsi Yaxın Şərqdə ümumi vəziyyət üçün “fəlakətli nəticələrə” gətirib çıxaracaqdır. Onun fikrincə, “bir çox tərəflər sabitliyin pozulmasından ərəb-İsrail münaqişəsində öz mənafelərini qorumaq üçün istifadə edəcəklər”. Ekspertin rəyincə, söhbət ən əvvəl həm fələstinlilər arasındakı, həm də İsrail hökumətindəki radikal ünsürlərdən gedir.
Bölmənin digər xəbərləri
