“Young Lions Azerbaijan 2025” müsabiqəsinin mükafatlandırma mərasimi olub
Bakı, 2 may, AZƏRTAC
Mayın 2-də “Baku Flames Beynəlxalq Yaradıcılıq və Effektivlik Festivalı” çərçivəsində “Young Lions Azerbaijan 2025” müsabiqəsinin mükafatlandırma mərasimi keçirilib.
AZƏRTAC xəbər verir ki, müsabiqədə “Film”, “Dizayn” və “Print” komandaları üç kateqoriya üzrə yarışıb.
Tədbirdə çıxış edən mədəniyyət nazirinin müavini Səadət Yusifova bildirib ki, bir neçə ildir Mədəniyyət Nazirliyinin dəstəyi ilə keçirilən bu müsabiqə ölkəmizdə mədəni və yaradıcı sənayelər sahəsində ən önəmli tədbirlərdən birinə çevrilib.
Nazir müavininin sözlərinə görə, bu yarışmada iştirak edən gənclər müxtəlif kreativ agentliklərdə fəaliyyətlərini davam etdirir, uğurlu layihələrə rəhbərlik edir və peşəkar karyeralarını yaradıcı sənayelər sahəsində quraraq ölkənin bu istiqamətdə inkişafına töhfə verirlər.
“Azərbaycan Respublikasının Prezidenti İlham Əliyevin Sərəncamı ilə 2024-cü ilin ölkəmizdə “Yaşıl dünya naminə həmrəylik ili” elan edildiyini nəzərə alaraq, ötən il müsabiqənin “Film” kateqoriyası üzrə təqdim olunan xülasə də bu mövzuya həsr olunub. Gənc iştirakçılar tərəfindən hazırlanan videolar BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası – COP29-a ithaf edilib. Bu yanaşma bir daha göstərir ki, yaradıcı sənayelər yalnız iqtisadi və estetik dəyər yaratmaqla kifayətlənmir, həm də cəmiyyətin qarşısında duran mühüm çağırışlara – ətraf mühitin qorunması, iqlim dəyişikliyi və dayanıqlı gələcək naminə təşəbbüslərə dəstək vermək gücünə malikdir. Müsabiqədə iştirak edən gənc dizaynerlərin, rejissorların və ideya müəlliflərinin işləri onların fərqli düşüncə tərzinə, problemlərə yaradıcı yanaşma bacarıqlarına və yüksək potensiala malik olduqlarına bariz sübutdur. Mədəniyyət Nazirliyi bu istiqamətdə gənc mütəxəssisləri dəstəkləmək üçün məqsədyönlü layihələr həyata keçirir. “Azərbaycan Respublikasının 2022–2026-cı illərdə sosial-iqtisadi inkişaf Strategiyası”nın Tədbirlər Planı çərçivəsində həyata keçirilən “Mədəniyyət və yaradıcı sənayelər üzrə xüsusi Təqaüd Proqramı” vasitəsilə bakalavriat və magistratura səviyyələri üzrə xaricdə təhsil dəstəklənir. Hazırda ümumilikdə 20 azərbaycanlı gənc – o cümlədən 4 nəfər dizayn sahəsində – ABŞ, Türkiyə, İtaliya və Fransa kimi ölkələrin nüfuzlu ali məktəblərində təhsil alır. Bu təşəbbüs onların şəxsi inkişafı ilə yanaşı, ölkədə yaradıcı sənayelərin inkişafına və beynəlxalq səviyyədə tanıdılmasına xidmət edir. Təqaüd proqramı dizayn da daxil olmaqla 11 sahəni əhatə edir və növbəti müsabiqədə bütün yaradıcı gənclər iştirak etməyə dəvət olunurlar. Eyni zamanda, Mədəniyyət Nazirliyinin dəstəyi ilə həyata keçirilən “Yaradıcı Mərkəz” layihəsi çərçivəsində bu sahədə yeni biznes subyektləri və startapların formalaşdırılması və inkişafı üçün müxtəlif təşəbbüslər icra olunur. Artıq bu çərçivədə 3 inkubasiya proqramı reallaşdırılıb və nəticədə 20-dən artıq yeni startap yaradılıb. Animasiya, musiqi, kino, dizayn və digər yaradıcı sənaye sahələrində süni intellektin tətbiqi üzrə ustad dərsləri və təlimlər təşkil olunub. Bu proqramlarda 400-dən çox iştirakçı yer alıb. Dizayn sahəsi Azərbaycanda sürətlə inkişaf edən yaradıcı sənaye sahələrindən biridir. 2019-cu ildə Bakının UNESCO-nun Yaradıcı Şəhərlər Şəbəkəsinə məhz “dizayn” istiqaməti üzrə üzv seçilməsi də bunu təsdiqləyir. Bu status Bakı şəhərinin qlobal miqyasda dizayn sahəsində söz sahibi olduğunu göstərir və sahənin inkişafı üçün böyük məsuliyyət yaradır”,- deyə S.Yusifova əlavə edib.
Kann Beynəlxalq Yaradıcılıq Festivalının Azərbaycandakı rəsmi nümayəndəsi Orxan Kərimov tədbir barədə məlumat verib: “Məqsəd yaradıcı şəxsləri bir araya gətirmək, istedadları tanıtmaq və onların beynəlxalq arenada tanınmasına dəstək olmaqdır. Bu cür təcrübə nə qədər çox yaşanarsa, inkişaf da bir o qədər sürətli olar. “Print” kateqoriyası üzrə xülasə Pasha Malls, “Film” üzrə Mədəniyyət Nazirliyinin “Yaradıcı Mərkəz” layihəsi, “Dizayn” üzrə isə Code Academy tərəfindən təqdim olunub”.
Daha sonra kateqoriyalar üzrə qaliblər mükafata layiq görülüblər. Hər üç kateqoriyanın qalibləri 2025-ci il iyunun 16-dan 20-dək Fransanın Kann şəhərində keçiriləcək dünyanın ən nüfuzlu reklam festivalı olan “Cannes Lions”da iştirak hüququ əldə ediblər.
Bölmənin digər xəbərləri
