YUNANISTANDA 2010-CU İL OLİMPİADASININ MƏŞƏLİ ALOVLANDIRILMIŞDIR
Bakı, 22 oktyabr (AZƏRTAC). Yunanıstanın Peloponnes yarımadasındakı qədim Olimpdə 2010-cu ilin qış Olimpiadasının məşəli alovlandırılmışdır. Ənənəyə uyğun olaraq, məşəl Günəş şüalarının köməyi ilə yandırılmışdır. Alov 2010-cu il fevralın 12-dən 28-dək Kanadanın Vankuver şəhərində keçiriləcək Olimpiadanın axırınadək şölə saçacaqdır. 2010-cu il Olimpiadasının rəsmi saytı xəbər verir ki, yaxın bir neçə ayda Olimpiya alovunun estafeti keçiriləcəkdir.
Estafetə Yunanıstanda başlanacaq, səkkiz gündən sonra məşəl Vankuverdə keçiriləcək Olimpiadanın təşkilatçılarına veriləcəkdir. Bundan sonra həmin məşəl təyyarə ilə Kanadanın Viktoriya şəhərinə çatdırılacaq və oradan Olimpiya alovu estafetinin Kanada mərhələsi başlanacaqdır.
2010-cu il fevralın 12-də Vankuverdə başa çatacaq ölkənin mindən çox şəhər və kəndindən keçəcək Kanada estafeti mərhələsinin məsafəsi 45 min kilometrə bərabər olacaqdır.
Bölmənin digər xəbərləri
