YUPİTERİN PEYKİ OLAN AVROPADA BİOLOJİ HƏYAT FORMALARI MÖVCUD OLA BİLƏR
Amerika alimləri “Qalileo” kosmik zondundan alınmış məlumatları diqqətlə araşdırdıqdan sonra Yupiterin peykində - Avropada həyatın mövcud ola biləcəyi barədə ehtimal irəli sürmüşlər. Arizona Universitetinin professoru Qrinberq iddia edir ki, peykin səthində nazik buz qatı ilə örtülmüş su aşkar edilmişdir. Onun başçılıq etdiyi elmi qrup müəyyənləşdirmişdir ki, həmin buzda çatlar və parçalanma vardır, bu isə suyun xarici mühitlə daim fəal təmasda olduğunu güman etməyə əsas verir. İndi bir sıra Qərb alimləri belə hesab edirlər ki, planet-peykdə bioloji həyatın yaranması üçün lazımi şərait mövcuddur, çünki su mühiti onun səthi ilə fəal qarşılıqlı əlaqədədir.
İTAR-TASS xəbər verir ki, bəzi elmi nəzəriyyələrə görə, Yerdə bioloji həyatın yaranmasının əsasını təşkil edən ən mühüm “struktur bloklar”ı Kainatın dərinliklərindən meteoritlər və asteroidlər gətirmişlər. Odur ki, bu nöqteyi-nəzərin tərəfdarları hesab edirlər ki, Avropa peyki, - Yerdəkindən çox fərqli olsa da, - bioloji həyat formalarının yarana biləcəyi göy cisimlərindən biri ola bilər.
Bölmənin digər xəbərləri
