“Yuventus” Emre Canın agentinə daha çox pul ödəyib
Bakı, 4 mart, AZƏRTAC
İtaliyanın “Tuttosport” nəşrində dərc olunan materialda Turinin “Yuventus” klubunun 2018/2019-cu illər mövsümündə öz futbolçularının agentlərinə ödəmələri açıqlanıb.
AZƏRTAC xəbər verir ki, yarımmüdafiəçi Emre Canın “Liverpul”dan keçməsi “Yuventus” klubuna digər futbolçulardan baha başa gəlib. E.Can ötən ilin yayında azad agent kimi turinlilərə qoşulub. Buna görə də klub onun agentinə ödəmələri artırmalı olub. E.Canın agenti bu transferə görə təqribən 15,9 milyon avro alıb.
Bu siyahıda ikinci yerdə hücumçu Kriştianu Ronaldunun maraqlarını təmsil edən Jorje Mendeş gəlir. Ötən yay K.Ronaldu da “Yuventus”un heyətinə keçib. Transferə görə italyanlara 100 milyon avrodan çox məbləğ ödənilib. Mendeşin payına 11,5 milyon avro düşüb.
Bu siyahıda ilk üçlüyü yarımmüdafiəçi Miralem Pyaniçin agenti tamamlayır. O, futbolçunun müqavilə müddətinin uzadılmasına kömək etdiyinə görə 2,2 milyon avrodan çox haqq alıb. “Yuventus” rəsmi nümayəndələrin ödəmələrinə təqribən 37 milyon avro pul xərcləyib.
Bölmənin digər xəbərləri
