Zaqatalada akademik Ramiz Mehdiyevin “Gorus-2010: absurd teatrı mövsümü” kitabının müzakirəsi keçirilmişdir
Zaqatala, 12 may (AZƏRTAC). Mayın 12-də Zaqatala şəhərində Heydər Əliyev Mərkəzində Azərbaycan Respublikası Prezidenti Administrasiyasının rəhbəri, akademik Ramiz Mehdiyevin “Gorus-2010: absurd teatrı mövsümü” kitabının müzakirəsi keçirilmişdir.
AZƏRTAC xəbər verir ki, ziyalıların, elm adamlarının, gənclərin, ictimaiyyət nümayəndələrinin iştirak etdiyi tədbirdə rayon icra hakimiyyətinin başçısı Mübariz Əhmədzadənin “Tarixi düşmənlərlə ideoloji mübarizədə mühüm elmi araşdırmalar” mövzusunda məruzəsi dinlənilmişdir.
Natiq akademik Ramiz Mehdiyevin bu kitabının erməni saxtakarlığının ifşası, habelə son əsrlərdə regionda baş verən ictimai-siyasi proseslərə aydınlıq gətirilməsi baxımından böyük əhəmiyyət daşıdığını diqqətə çatdırmış, kitabın tarixin bütün mərhələlərində ikiüzlü və xain kimi tanınan, soyqırımı uydurmaları ilə dünya ictimaiyyətinin diqqətini daim cəlb etməyə çalışan erməni təbliğatına qarşı çox qiymətli elmi mənbə olduğunu vurğulamışdır.
Bildirmişdir ki, görkəmli filosofun tarixçilər, siyasətçilər, habelə geniş oxucu kütləsi üçün nəzərdə tutulan bu fundamental əsrində təkcə Serj Sarkisyanın erməni absurd teatrının səhnəsində göstərdiyi növbəti tamaşası deyil, həmçinin erməni liderlərinin tarixi saxtalaşdırmaq, beynəlxalq ictimaiyyəti yeni uydurma və yalanlarla çaşdırmaq cəhdləri elmi dəlillərlə ifşa edilmişdir. Ermənistan dövlətinin əzəli Azərbaycan torpağında yaradıldığı tarixi faktlarla diqqətə çatdırılmışdır. Erməni ideoloqlarına elmi dəlillərlə tutarlı cavab verən müəllif onların “arqumentlərinin” əsassızlığını sübuta yetirir. Əsərin ən mühüm məziyyəti bundan ibarətdir ki, burada verilmiş faktlara həm siyasətçi, həm də tarixçi kimi yanaşmaq mümkündür.
Müəllif kitabda Ermənistan-Azərbaycan, Dağlıq Qarabağ münaqişəsinin danışıqlar yolu ilə tənzimlənməsi prosesində Ermənistan rəhbərlərinin dünya ictimaiyyətini çaşdırmaq cəhdlərini elmi əsaslarla və ustalıqla ifşa etmişdir. Akademik R.Mehdiyev hazırda Ermənistanda mövcud olan siyasi ab-havanın və sosial vəziyyətin çox düzgün təhlilini vermişdir. Kitab tarixilik baxımından da çox mühüm əhəmiyyətə malikdir. Bu qiymətli əsərdə bir daha sübut olunur ki, hazırda Ermənistan Respublikasının yerləşdiyi ərazi bütün tarixi dövrlərdə Azərbaycan dövlətinə məxsus olmuşdur. Bu torpaqların ən qədim yerli əhalisi - aborigen sahibləri Azərbaycan türkləri idi. Müəllif çox düzgün olaraq erməni katolikosluğunun mərkəzinin Kilikiyanın Sis şəhərindən 1441-ci ildə Azərbaycan Qaraqoyunlu hökmdarı Cahanşahın icazəsi ilə İrəvan (Çuxursəd) bölgəsinə köçürülməsinə qədər Cənubi Qafqazda ermənilərin yaşamadığını qeyd edir. Əsərdə ermənilərin nəinki Cənubi Qafqaza, hətta Ön Asiyaya da gəlmə olduqları, azərbaycanlılara məxsus yer adlarının ermənilər tərəfindən dəyişdirilməsi, Azərbaycan xalqının tarixinin erməni müəllifləri tərəfindən kobudcasına saxtalaşdırılması və digər mühüm məsələlər də elmi əsaslarla işıqlandırılmışdır.
Xalqımızın ümummilli lideri Heydər Əliyevin 1993-cü ildə hakimiyyətə qayıdışından sonra Azərbaycanın xəritəsini hazırladaraq bütün dünyanı dolaşması, Dağlıq Qarabağın tarixi erməni torpağı olması barədə cəfəngiyyatı şəxsən ifşa etməsi, ulu öndərimizin ermənilər tərəfindən Azərbaycan ətrafında yaradılmış informasiya blokadasını məharətlə yarması bu möhtəşəm əsərdə xüsusilə vurğulanmışdır.
Qeyd olunmuşdur ki, hazırda bu mübarizə Azərbaycan Prezidenti İlham Əliyevin rəhbərliyi və şəxsi iştirakı ilə yeni mərhələyə qədəm qoymuşdur. Ötən il oktyabrın 14-də Yevlax şəhərində yeni məktəbin açılışı mərasimində dövlətimizin başçısının tariximizin uşaqlara öyrədilməsi ilə bağlı qiymətli fikirləri bu gün hər birimiz üçün proqram sənədi olmalıdır. Bu günün uşaqları, gəncləri Ermənistan dövlətinin tarixi Azərbaycan torpaqlarında yaradıldığını, bunun Azərbaycan Xalq Cümhuriyyətinin rəsmi sənədlərində öz əksini tapdığını bilməlidirlər.
Tədbirdə həmçinin, Kəpənəkçi kəndinin ağsaqqalı, baş müəllim Sabir Qurbanovun “Tarixi gerçəkliyin saxtalaşdırılması cəhdləri”, Azərbaycan Müəllimlər İnstitutu Zaqatala filialının dekanı Füzuli Sadəddinovun “Böyük Ermənistan” yaratmaq xülyası ilə yaşayanlara tutarlı cavab”, həmin institutun müəllimi Qüdrət Qırtımovun “Dağlıq Qarabağ və tarixi həqiqətlər” mövzularında məruzələri dinlənilmişdir.
Mövzu ətrafında çıxış edən natiqlər akademik Ramiz Mehdiyevin bu kitabının təkcə erməni riyakarlığına cavab vermək baxımından deyil, həm də çoxsaylı tarixi faktları özündə əks etdirməsi, Ermənistan-Azərbaycan, Dağlıq Qarabağ münaqişəsinin səbəb və nəticələrinin təhlili, son 200 ildə regionda baş verən ictimai-siyasi proseslərə aydınlıq gətirməsi baxımından da xüsusi əhəmiyyətə malik olduğunu, dünyanın müxtəlif regionlarında yaşayan siyasətşünaslar, qafqazşünaslar üçün qiymətli mənbə olduğunu xüsusi vurğulamışlar. Bildirilmişdir ki, şübhəsiz, akademik Ramiz Mehdiyevin “Gorus-2010: absurd teatrı mövsümü” kitabı tariximizin gələcək nəsillərə ləyaqətlə çatdırılmasında ən yaxın silahdaşımız olacaq, milli-tarixi özünüdərk və özünə qayıdışımızın məhək daşı kimi əsrlər boyu xatirələrdə yaşayacaqdır.
Bölmənin digər xəbərləri
