Sabiq Baş nazir: Dayanıqlı İnkişaf Məqsədlərinin icrası ilə bağlı vəziyyət narahatlıq doğurur
Bakı, 9 sentyabr, AZƏRTAC
Dayanıqlı İnkişaf Məqsədlərinin (DİM) icrası ilə bağlı vəziyyət narahatlıq doğurur. Qarşıda beş il qalmasına baxmayaraq, məqsədlərin yalnız 15 faizinin icrası plan üzrə gedir, daha 15 faiz üzrə isə 2015-ci illə müqayisədə geriləmə müşahidə olunur. Təxminən üçdə iki hissə üzrə isə mövcud tendensiyalar məqsədlərə vaxtında nail olunmayacağını göstərir.
AZƏRTAC xəbər verir ki, bunu Bosniya və Herseqovinanın BMT-də daimi nümayəndəsi, ölkənin sabiq Baş naziri Zlatko Laqumdziya “Bakı İqlim Fəaliyyəti Həftəsi 2026” çərçivəsində Nizami Gəncəvi Beynəlxalq Mərkəzinin təşkilatçılığı ilə keçirilən "COP31-dən sonra iqlim liderliyi: Tərəfdaşlıq vasitəsilə icranın təmin edilməsi" adlı dəyirmi masada çıxış edərkən deyib.
Ən yaxşı nəticələrin internetə çıxış, rəqəmsal transformasiya və bərpaolunan enerjiyə keçid sahələrində qeydə alındığını vurğulayan sabiq Baş nazir əlavə edib: "Ən zəif göstəricilər isə sülh və təhlükəsizlik məsələlərini əhatə edən DİM-in 16-cı məqsədi, eləcə də ərzaqla bağlı 2-ci məqsəd üzrə müşahidə olunur. Ərzaq sahəsində mənfi göstəricilər yalnız aclıqla deyil, piylənmə ilə də bağlıdır. DİM-lərin həyata keçirilməsi üçün məqsədlərin müəyyənləşdirilməsi ilə yanaşı, onların reallaşdırılmasına xidmət edən səmərəli mexanizmlər də formalaşdırılmalıdır".
Bölmənin digər xəbərləri
