ZAQATALADA BUĞDA ƏKİNİ SAHƏLƏRİ TƏQRİBƏN İKİ DƏFƏ ARTMIŞDIR
Zaqatala Rayon İcra Hakimiyyətindən AZƏRTAC-a bildirmişlər ki, rayonun taxılçılıq təsərrüfatlarında gələn ilin məhsulu üçün payızlıq taxıl səpini mütəşəkkil davam edir. Cari mövsümdə rayonda taxıl əkini sahələrinin keçən ilə nisbətən 2 min hektar artırılaraq, 6 min hektara çatdırılacağı proqnozlaşdırılsa da, fermerlər indiyədək artıq 6 min 700 hektar sahədə səpini başa çatdırmışlar. Nazirlər Kabinetinin “Buğda istehsalçılarının maddi marağının artırılması və buğda istehsalının stimullaşdırılması ilə bağlı əlavə tədbirlər haqqında” qərarından ruhlanan rayon taxılçıları builki mövsümdə buğda əkininə daha çox maraq göstərirlər. Məhz bunun nəticəsidir ki, indiyədək rayonda 4 min 700 hektar sahədə payızlıq buğda əkilmişdir. Bu, əvvəlki illə müqayisədə 2 min 124 hektar çoxdur.
Səpin kampaniyasına 265 ədəd təkərli və 15 ədəd tırtıllı traktor, habelə 29 ədəd səpin aqreqatı cəlb edilmişdir. Səpin üçün 2.663 ton yüksək reproduksiyalı toxum fondu ayrılmış, fermerlərə güzəştli qiymətlərlə 425 ton mineral gübrə paylanmışdır. Rayonda payızlıq taxıl səpini davam edir.
Bölmənin digər xəbərləri
