ZAQATALADA ÇAY ASSOSİASİYASI YARADILMIŞDIR
Özünəməxsus çayçılıq ənənələrinə malik olan Zaqatala rayonunda Çay Assosiasiyası yaradılmışdır.
Rayon icra hakimiyyətindən AZƏRTAC-a bildirmişlər ki, yeni yaradılan qurumun məqsədi çay istehsalı ilə məşğul olan tərəfdaşları birləşdirmək, rayonda çayçılığın həm kəmiyyət, həm də keyfiyyət baxımından inkişaf etdirilməsinə nail olmaqdır. Assosiasiyanın 35 nəfər üzvü vardır. Zaqatalada çayçılığın inkişafında maraqlı olan Almaniya Texniki Əməkdaşlıq Cəmiyyəti (GTZ) qurumun fəaliyyətində məşvərətçi səslə iştirak edəcəkdir. Rayonun ən iri çay emalı müəssisəsi olan “Zaqatala-Çay” MMC-nin rəhbəri Abdulməcid Şabanov assosiasiyanın prezidenti seçilmişdir.
Xatırladaq ki, Almaniya Texniki Əməkdaşlıq Cəmiyyəti Azərbaycanda Özəl Bölmənin İnkişafı Proqramı çərçivəsində Zaqatalada çayçılığın inkişafı ilə bağlı xüsusi layihə həyata keçirir. Layihəyə uyğun olaraq, cəmiyyətin xətti ilə rayona çay bitkisinin budanması və ona forma verilməsi üçün müasir avadanlıq gətirilmiş, mövcud çay plantasiyaları sahələrinin yeni texnologiyalarla becərilməsinə başlanılmışdır.
Bölmənin digər xəbərləri
