108 yaşlı qalib ordu Azərbaycanın müstəqilliyini, suverenliyini və təhlükəsizliyini qətiyyətlə qoruyur
Bakı, 26 iyun, AZƏRTAC
1918-ci il iyunun 26-da əsası qoyulan Azərbaycan Silahlı Qüvvələri ötən 108 il ərzində şərəfli inkişaf yolu keçərək regionun ən güclü ordularından birinə çevrilib. Bu gün Azərbaycan Ordusu yalnız ölkəmizin deyil, bütövlükdə Cənubi Qafqazda təhlükəsizlik və sabitliyin qarantıdır.
Müstəqil Azərbaycanda ordu quruculuğunun möhkəm təməli Ümummilli Lider Heydər Əliyev tərəfindən qoyulub. Məhz Ulu Öndərin müəyyən etdiyi strateji xətt Prezident, Müzəffər Ali Baş Komandan İlham Əliyev tərəfindən müasir dövrün çağırışlarına uyğun şəkildə uğurla davam etdirilir. Son illərdə həyata keçirilən ardıcıl islahatlar, Silahlı Qüvvələrin maddi-texniki bazasının gücləndirilməsi, peşəkar hərbi kadrların hazırlanması və ən müasir silah sistemlərinin arsenalımıza daxil edilməsi Azərbaycan Ordusunu keyfiyyətcə yeni mərhələyə yüksəldib.
Bu barədə AZƏRTAC-a açıqlamasında Milli Məclisin deputatı Könül Nurullayeva bildirib.
Deputat qeyd edib ki, bu güc və hazırlıq 2020-ci ilin 44 günlük Vətən müharibəsində bütün dünyaya nümayiş etdirildi. Azərbaycan Ordusu cəmi 44 gün ərzində bir dəfə belə geri çəkilmədən ardıcıl irəlilədi, işğal altındakı torpaqları azad etdi və tarixi Zəfərə imza atdı. Prezident İlham Əliyevin qeyd etdiyi kimi, Vətən müharibəsi Azərbaycan xalqının əyilməz iradəsini, dövlətimizin qüdrətini və ordumuzun peşəkarlığını bütün dünyaya göstərdi. Müasir texnologiyaların, dəqiq planlaşdırmanın, yüksək döyüş hazırlığının və sarsılmaz milli ruhun vəhdəti Azərbaycan Ordusunu XXI əsrin yeni nəsil müharibəsinin qalibinə çevirdi. Təsadüfi deyil ki, Vətən müharibəsində tətbiq olunan taktika və əməliyyatlar dünyanın aparıcı hərbi məktəblərində öyrənilir.
“Qələbənin əsas dayaqlarından biri də Azərbaycan əsgərinin və zabitinin yüksək mənəvi hazırlığı idi. Müharibə dövründə Azərbaycan Ordusunda bir nəfər də olsun fərari qeydə alınmadı. Əksinə, yaralı hərbçilər belə döyüş meydanına qayıdaraq missiyalarını başa çatdırmağa çalışırdılar. Bu fakt xalq–ordu birliyinin, vətənpərvərlik ruhunun və dövlətə sədaqətin ən parlaq nümunəsi kimi tarixə düşdü.
2023-cü ilin sentyabrında keçirilən lokal antiterror tədbirləri isə Azərbaycan Ordusunun döyüş qabiliyyətinin növbəti təsdiqi oldu. Cəmi bir neçə saat ərzində separatizmə son qoyuldu və Azərbaycanın dövlət suverenliyi tam təmin edildi. Bu əməliyyat həm peşəkar planlaşdırılması, həm də dəqiq icrası ilə dünya hərb tarixində diqqət çəkən uğurlu nümunələrdən biri kimi qiymətləndirilir”, - deyə o bildirib.
Deputat vurğulayıb ki, Böyük Qələbədən sonra ordu quruculuğu yeni mərhələyə qədəm qoyub. Hazırda Silahlı Qüvvələrdə struktur islahatları davam etdirilir, Xüsusi Təyinatlı Qüvvələrin imkanları genişləndirilir, yeni komando hərbi hissələri yaradılır və onların sayı artırılır. Müasir döyüş təcrübəsinə əsaslanan bu yeni hərbi model Azərbaycanın müdafiə qabiliyyətini daha da gücləndirərək istənilən təhlükəyə operativ cavab vermək imkanlarını artırır.
Ordumuzun qüdrətinin mühüm sütunlarından biri də milli hərbi sənaye kompleksidir. Azərbaycanın istehsal etdiyi hərbi texnika və avadanlıqlar beynəlxalq sərgilərdə nümayiş olunur, bir çox ölkələrə ixrac edilir. Bu isə həm ölkəmizin texnoloji potensialının, həm də iqtisadi və hərbi gücünün göstəricisidir.
Azərbaycan eyni zamanda dost və tərəfdaş dövlətlərlə hərbi əməkdaşlığı genişləndirir, beynəlxalq təlimlərdə fəal iştirak edir, gənclərin hərbi təhsil almasına və peşəkar zabit kimi yetişməsinə xüsusi diqqət yetirir. Dövlət büdcəsində müdafiə və təhlükəsizlik xərclərinin prioritet istiqamətlərdən biri olması da bu siyasətin davamlı xarakter daşıdığını göstərir.
“Bu gün Azərbaycan Silahlı Qüvvələri işğaldan azad olunmuş torpaqlarımızın, dövlət sərhədlərimizin və milli maraqlarımızın keşiyində inamla dayanır. Döyüş meydanında qazandığı tarixi Zəfər, peşəkarlığı, yüksək mənəvi ruhu və müasir hərbi potensialı ilə ordumuz regionun təhlükəsizlik qarantlarından birinə çevrilib.
Prezident İlham Əliyevin də söylədiyi kimi: “Biz elə bir güclü ordu yaratmışıq ki, istənilən vəzifəni icra edə bilərik.”
108 yaşlı Azərbaycan Silahlı Qüvvələri bu gün qalib ordu kimi xalqın gücünün, dövlətin qüdrətinin və milli həmrəyliyin rəmzi kimi Azərbaycanın müstəqilliyini, suverenliyini və təhlükəsizliyini qətiyyətlə qoruyur”, - deyə deputat əlavə edib.
Bölmənin digər xəbərləri
