29 saylı Səbail seçki dairəsi dairə seçki komissiyasında maarifləndirici treninqlər təşkil olunub VİDEO
Bakı, 12 mart, AZƏRTAC
Martın 12-də 29 saylı Səbail seçki dairəsi dairə seçki komissiyasında (DSK) məntəqə seçki komissiyalarının sədrləri və üzvləri üçün üçgünlük maarifləndirici treninqlər təşkil olunub.
AZƏRTAC xəbər verir ki, treninqdə plana uyğun olaraq, məntəqə seçki komissiyasının sədrləri və üzvləri iştirak ediblər. Bundan başqa, yaradılan müvəqqəti məntəqələrin, eləcə də seçki dairəsinin ərazisində məskunlaşan məcburi köçkünlərin daxil olduğu məntəqə seçki komissiyalarının sədrləri və üzvləri də treninqlərə cəlb ediliblər.
29 saylı Səbail seçki dairəsi dairə seçki komissiyasının sədri Cahangir Məmmədov Mərkəzi Seçki Komissiyasının təlimatı və tövsiyəsi əsasında təşkil edilən treninqlərin əhəmiyyətindən danışıb. Məlumat verilib ki, dairə və məntəqə seçki komissiyaları üzvlərinin peşəkarlıq səviyyəsinin artırılması, seçkilər sahəsində onların bilik, bacarıq və vərdişlərinin daha da təkmilləşdirilməsi məqsədilə Mərkəzi Seçki Komissiyasının treninq qrupu tərəfindən yerlərdə keçiriləcək treninqlərin cədvəli, eləcə də seçki günü əsas seçki hərəkətləri ilə bağlı slaydlar hazırlanıb. Aşağı seçki komissiyaları üçün treninqlər martın 12-dən başlayaraq Səbail seçki dairəsi üzrə bütün məntəqə seçki komissiyalarının sədrləri və üzvləri üçün müvafiq qaydada üç gün müddətində davam edəcək. Treninqlərdə trenerlər iştirakçıları səsvermə günü onların görəcəkləri işlərlə, seçki məntəqələrinin açılışına hazırlıqlarla, səsvermə saatlarında həyata keçiriləcək tədbirlərlə bağlı təqdimatlarla və slaydlarla izahlı şəkildə məlumatlandırırlar.
Dairə üzrə treninqlər əyani vəsaitlərdən də istifadə edilməklə, kiçik qruplar şəklində - hər treninq sessiyasında 35-40 nəfərədək komissiya üzvünün iştirakı ilə keçirilir. Treninqlərdə seçki günü əsas qanunamüvafiq seçki hərəkətləri, eləcə də qanunsuz hərəkətlərin qarşısının alınması barədə məlumat verilir.
C.Məmmədov qeyd edib ki, dairədə aprelin 11-də keçiriləcək prezident seçkilərinə hazırlıq işləri uğurla davam etdirilir. Məntəqələrdə seçkilərin şəffaf və demokratik keçirilməsi, komissiya üzvlərinin normal fəaliyyəti üçün lazımi şərait yaradılıb.
Diqqətə çatdırılıb ki, 38 min 782 seçicisi olan dairə seçki komissiyasının ərazisində 30 daimi seçki məntəqəsi fəaliyyət göstərir. Prezident seçkilərinə ən geci bir neçə gün qalmış əlavə olaraq BP şirkətinin platformalarında, müxtəlif xəstəxanalarda, iki hərbi hissədə, Xəzər Dəniz Gəmiçiliyində olmaqla, ümumilikdə, 8 müvəqqəti məntəqənin yaradılması nəzərdə tutulur. Komissiya üzvlərinin normal fəaliyyət göstərməsi üçün məntəqələrdə hər cür şərait yaradılıb. Məntəqələr lazımi texniki avadanlıqla və məlumat kitabçaları ilə tam təchiz edilib. Şəffaflığın təmin olunması məqsədilə məntəqələrin 12-də veb-kameralar quraşdırılıb.
Dairə seçki komissiyasının katibi Elmar Hüseynov tərəfindən aparılan, maarifləndirici məqsəd daşıyan, beş sessiyadan ibarət olan aşağı seçki komissiyaları üçün treninqlərdə iştirakçılara səsvermə günü məşvərətçi səs hüquqlu üzvlərin, müşahidəçilərin və KİV nümayəndələrinin hüquq və vəzifələri və onlarla iş qaydası, seçki günü məntəqə seçki komissiyalarının rolu və vəzifələri, seçki günü prosedurları və müstəsna hallar, səslərin sayılmasına hazırlıq, seçki bülletenlərinin təsnifatı, səslərin sayılması və səsvermənin nəticələri haqqında protokolun hazırlanması və doldurulması, səsvermə prosedurlarına dair nəzəri və praktiki tapşırıqlar mövzularında təfsilatlı və əyani şəkildə məlumat verilir, məntəqə seçki komissiyalarının üzvləri ilə müzakirələr aparılır.
Treninqlərdə prezident seçkilərinə hazırlıq, seçkilərin keçirilməsi, səslərin hesablanması prosesi və səsvermənin nəticələrin rəsmiləşdirilməsi işində məntəqə seçki komissiyalarının üzvlərinin vəzifələri və fəaliyyətlərinin təşkili məsələlərindən, aşağı seçki komissiyaları tərəfindən seçki hüququnun qorunması mexanizmlərindan də danışılır. Həmçinin iştirakçılara seçki məntəqələrinin səsverməyə hazırlanması, səsvermə prosesi daxil olmaqla bütün səsvermə günü prosedurları barədə slaydlarla müfəssəl məlumat verilir.
Tədbirdə seçici siyahıları ilə iş qaydasından və seçici siyahılarının dəqiqləşdirilməsindən də söz açılıb. Diqqətə çatdırılıb ki, 29 saylı Səbail seçki dairəsi dairə seçki komissiyasında seçici siyahıları və bildirişlər artıq hazırdır. Seçicilərin hamısı seçici siyahısında öz əksini tapıb. Bildirişlərin qanunda nəzərdə tutulmuş vaxt ərzində seçicilərə çatdırılması təmin olunacaq.
Çıxış edənlər prezident seçkilərinin tam demokratik şəraitdə keçirilməsi üçün komissiya üzvlərinin öz işlərinə məsuliyyətlə yanaşmasının önəmini qeyd ediblər. Bildirilib ki, səsvermə günü qanunvericiliyə əsasən səsvermə prosesi ilə bağlı məlumatların ictimaiyyətə çatdırılması üçün yerli və beynəlxalq müşahidəçilərin, KİV-lərin fəaliyyətinə hər cür şərait yaradılacaq. Seçki komissiyalarının üzvləri yerli və xarici müşahidəçilərlə, mətbuat işçiləri ilə təlimata uyğun işləməyin qaydalarını dəqiq öyrənməlidirlər.
Sonra trenerlər iştirakçıları maraqlandıran sualları cavablandırıblar.
Treninqlər zamanı hər bir məntəqə seçki komissiyası üzvünə “Seçki günü üçün yaddaş” kitabçası, səsvermənin nəticələri haqqında protokol nümunəsi və bir sıra digər sənəd nümunələri təqdim edilir.
Qeyd edək ki, bu dairə üzrə treninqlər martın 12-də və 13-də ümumilikdə hər gün on iki məntəqədə, martın 14-də isə altı məntəqədə olmaqla üç gün ərzində keçiriləcək.
Bölmənin digər xəbərləri
