Ağcabədi, 15 may, Tahir Ağaməmmədov, AZƏRTAC

Ağcabədi rayonunda Hacıbədəlli-Pərioğlular-Təzəkənd avtomobil yolunun tikintisi Azərbaycan Avtomobil Yolları Dövlət Agentliyi tərəfindən sürətlə davam etdirilir. Səkkiz min nəfər əhalinin yaşadığı 3 yaşayış məntəqəsini birləşdirən avtomobil yolunun tikintisi məqsədilə Azərbaycan Respublikası Prezidentinin 2018-ci il 2 may tarixli Sərəncamı ilə dövlət büdcəsindən 8 milyon manat vəsait ayrılıb.

Tikintinin mühəndisi Yaşar Piriyev AZƏRTAC-ın bölgə müxbirinə bildirib ki, uzunluğu 18 kilometr olan avtomobil yolu respublika əhəmiyyətli Ağdam-Hindarx-Ağcabədi və Mingəçevir-Bəhrəmtəpə yolları ilə birləşir. Layihəyə uyğun olaraq yol IV texniki dərəcəyə uyğun inşa edilir. Tikinti işləri çərçivəsində xüsusi çınqıl materialı, həmçinin optimal-qırmadaş qarışığından istifadə edilməklə, yol yatağının və yol əsasının tikintisi və genişləndirilməsi yekunlaşdırılıb. Yolun ümumi eni 10 metrə çatdırılıb. İki hərəkət zolaqlı olan yola 6 metr enində hərəkət hissə və hər bir istiqamət üzrə 2 metr enində çiyinlər daxildir. Yola müxtəlif yerlərdə su keçidi üçün 38 ədəd müxtəlif diametrli metal boru qoyulub, 1 ədəd diametri 1250 millimetr olan 16 metr uzunluğunda suötürücü keçid inşa edilib. Yolboyu 6 yerdə avtodayanacaq quraşdırılıb.

Hazırda yeni asfalt-beton örtüyünün döşənməsi işləri aparılır. İki laydan ibarət asfalt-beton örtüyünün ümumi qalınlığı 12 santımetr olacaq. Artıq 12 kilometrdə birinci qat asfalt örtüyün döşənməsi həyata keçirilib. Avtomobil yolunun tikintisinə lazımi sayda işçi və texnika cəlb edilib. Yolun tikintisinin qısa vaxt ərzində başa çatdırılması nəzərdə tutulur.

Hacıbədəlli-Pərioğlular-Təzəkənd avtomobil yolunun yenidən qurulması sakinlərin sevincinə səbəb olub. Pərioğullar kənd sakini Mansur Quliyev AZƏRTAC-ın bölgə müxbiri ilə söhbətində deyib: “Yolun çəkilişi ilə əhalinin rayon mərkəzinə və qonşu kəndlərə gediş-gəlişi asanlaşacaq. Sakinlər kənd təsərrüfatı məhsullarını bazara asanlıqla çıxara biləcəklər. Bunun üçün dövlətimizə minnətdarlığımı bildirirəm”.

Asfalt işləri başa çatdıqdan sonra avtonəqliyyat vasitələrinin normal hərəkətini təmin etmək məqsədilə zəruri yerlərdə 140 ədəd yol nişanı və məlumatverici lövhə, 400-ə yaxın siqnal dirəyi quraşdırılacaq, yol-cizgi və yolgöstərici xətlərin çəkilişi işləri aparılacaq. Hacıbədəlli-Pərioğlular-Təzəkənd avtomobil yolunun tikintisi ilə vətəndaşlarının gediş-gəlişi rahatlaşacaq, yük və sərnişin daşıması asanlaşacaq.