CƏMİYYƏT
Bakıda insan alverinə qarşı mübarizəyə dair beynəlxalq seminar keçirilir VİDEO
Bakı, 3 aprel, AZƏRTAC
Aprelin 3-də Beynəlxalq Miqrasiya Təşkilatının Azərbaycandakı nümayəndəliyi (BMqT) və Ədliyyə Akademiyasının birgə təşkilatçılığı ilə Bakıda "Cinayət istintaq orqanlarının insan alveri ilə mübarizə sahəsində rolu" mövzusunda beynəlxalq seminar keçirilir. Tədbir Avropa İttifaqı (Aİ) və BMqT tərəfindən dəstəklənən "Azərbaycanda insan alverinə qarşı mübarizə üzrə milli potensialın artırılması" layihəsi çərçivəsində təşkil olunub.
AZƏRTAC xəbər verir ki, tədbirin məqsədi Azərbaycan hökumətinin insan alverinə qarşı mübarizəsinin və insan alveri qurbanlarının müdafiəsinin daha səmərəli aparılması üzrə potensialın, habelə layihəyə cəlb olunacaq hakimlərin, vəkillərin və digər təlimçilərin insan alveri ilə mübarizə sahəsində bilik və bacarıqlarının artırılmasından ibarətdir. İnsan alverinə qarşı səmərəli mübarizə üzrə əməkdaşlıq və məlumat mübadiləsini gücləndirmək də tədbirin əsas məqsədlərindəndir.
Seminarda bir sıra xarici ölkələrin və beynəlxalq qurumların təmsilçiləri, hakimlər, prokurorlar, vəkillər, Ədliyyə və Daxili İşlər nazirliklərinin əməkdaşları iştirak edirlər.
Daxili İşlər Nazirliyinin İnsan Alverinə Qarşı Mübarizə Baş İdarəsinin rəisi, polis general-mayoru Heydər Heydərov Azərbaycanda bu sahədə görülmüş işlərdən danışıb. Bildirib ki, insan alveri əksər dövlətlər və beynəlxalq təşkilatlar tərəfindən ciddi transmilli təhdidlərdən biri kimi qəbul edilir. Hazırda Milli Fəaliyyət planlarında irəli gələn mühüm tədbirlərin həyata keçirilməsinə Prezident İlham Əliyevin verdiyi böyük siyasi dəstək, insan alverinə şərait yaradan sosial problemlərin aradan qaldırılması, əhalinin rifah halının yaxşılaşdırılması üzrə aparılan hərtərəfli islahatlar, hüquq-mühafizə fəaliyyətinin gücləndirilməsinə yönəlmiş atılan addımlar həmin əməllərin profilaktikasına və cinayət təqibinin ən yüksək səviyyədə təşkilinə, vətəndaşların qanuni mənafelərinin etibarlı müdafiə etməyə imkan verir. Azərbaycan Respublikasının qanunları ilə ratifikasiya edilmiş beynəlxalq sənədlər və konvensiyalar insan alverinə qarşı mübarizədə institusional inkişaf üçün yeni imkanlar açıb. Ötən illərdə xarici ölkələrin mütərəqqi iş təcrübəsi və ixtisaslaşmış beynəlxalq təşkilatların rəyi nəzərə alınmaqla 80-dən çox qanunvericilik aktı və digər normativ sənəd qəbul edilib.
Diqqətə çatdırılıb ki, təşkilati tədbirlər Azərbaycanın müvafiq qurumları ilə yanaşı, yerli icra hakimiyyəti orqanları, QHT və beynəlxalq tərəfdaşlarla qarşılıqlı şəkildə planlı surətdə yerinə yetirilir. Mənbə, tranzit, təyinat ölkələrində insan alverinə qarşı mübarizəni həyata keçirən hüquq-mühafizə orqanlarının səylərinin birləşdirilməsində, potensialının gücləndirilməsində vacib elementlərdən olan beynəlxalq əlaqələrin inkişafı üzrə tədbirlər məqsədyönlü olub. Beynəlxalq təşkilatlar və xarici ölkələrin Azərbaycandakı səfirliklərinin nümayəndələri ilə insan alverinə qarşı mübarizədə əməkdaşlığın perspektivləri barədə informasiya mübadiləsi aparılıb.
Daxili və Xarici İşlər nazirliklərinin təşəbbüsü və beynəlxalq təşkilatların dəstəyi ilə keçirilən tədbirlərdə insan alverinə qarşı mübarizədə ölkəmizin beynəlxalq öhdəliklərinin yerinə yetirilməsinin vəziyyəti və milli təcrübəsi barədə xarici tərəfdaşlar ətraflı məlumatlandırılıb. Respublikada insan alverinin və məcburi əməyin qarşısının alınmasında fəaliyyətin səmərəliliyi nüfuzlu beynəlxalq qurumların aidiyyəti sənədlərində xüsusi vurğulanıb.
Ədliyyə Akademiyasının rektoru vəzifəsini icra edən Elçin Xələfov bu sahədə ölkəmizin beynəlxalq təşkilatlarla səmərəli əməkdaşlıq və tərəfdaşlıq əlaqələri qurduğunu bildirib, layihənin ölkəmiz üçün verdiyi töhfələr və nəticələrindən danışıb. Tədris prosesində bu sahəyə xüsusi önəm verilməsinin və maarifləndirmə işinin aparılmasının vacibliyini vurğulayan E.Xələfov qeyd edib ki, insan alverinə qarşı mübarizə həm də bu sahədə təlim və tədrisin düzgün təşkili ilə bağlıdır. Ədliyyə Akademiyasında ixtisaslaşmış tanınmış ekspertlərin iştirakı ilə bu sahəni tədris edən təlimçilərin hazırlanmasına diqqət yetirilib. Layihə çərçivəsində Bakıda və regionlarda bir sıra seminarlar, təlimlər təşkil olunub. Ədliyyə Akademiyasının ixtisasartırma təlimlərinin təşkili bu istiqamətdə mühüm səmərə verib. Seminar Azərbaycan təcrübəsini beynəlxalq ekspertlərlə bölüşmək və beynəlxalq təcrübənin öyrənilməsi sahəsində yaxşı imkan yaradır.
Aİ-nin Azərbaycandakı nümayəndəliyinin müşaviri Simona Qatti insan alverinə qarşı mübarizə sahəsində mühüm işlər görən Azərbaycan hökumətinin səylərini, tərəfdaşlığını və əməkdaşlığını yüksək qiymətləndirib və cinayət istintaq orqanlarının daha çox dəstək və təkmilləşdirmə tələb edən sahələrdən olduğunu bildirib.
Beynəlxalq Miqrasiya Təşkilatının Azərbaycandakı nümayəndəliyinin rəhbəri Vladimir Qjorjiyev bildirib ki, “Azərbaycanda insan alverinə qarşı mübarizə üzrə milli potensialın artırılması” layihəsinin məqsədi insan alverinə qarşı Avropa hüququna və beynəlxalq standartlara uyğun mübarizənin aparılması, insan hüquqları və fundamental azadlıqlar ilə bağlı hüquqi müddəaların şərhinə və tətbiqinə dəstək vermək üçün Azərbaycan hökumətinin insan alveri və transmilli mütəşəkkil cinayətkarlıqla mübarizə tədbirlərini dəstəkləməkdir. O, ikigünlük seminarın cinayət təqibi ilə məşğul olan orqanların işinə töhfə verəcəyini və onların insan alveri ilə bağlı cinayətlərin qarşısının alınması, qurbanların müdafiəsi və hüquqlarının qorunmasında, cinayətkarların təqibi və bu sahədə əməkdaşlıq strategiyasına uyğun potensiallarını artıracağına əminliyini bildirib.
Tədbirdə beynəlxalq, regional və yerli səviyyədə insan alveri ilə mübarizə sahəsində əməkdaşlıq, bu sahədə milli qanunvericiliyin təkmilləşdirilməsi və tətbiqi məsələləri müzakirə olunur.
Seminarda DİN-in İnsan Alverinə qarşı Mübarizə Baş İdarəsinin şöbə rəisi İlkin Qurbanov “İnsan alveri əməlinin kriminillaşdırılması, Azərbaycanda insan alveri ilə mübarizə sahəsində qanunvericilik və yerli təcrübə” mövzusunda təqdimatla çıxış edib, ölkəmizdə insan alverinə qarşı mübarizəyə dair qəbul olunan Milli Fəaliyyət Planları haqqında məlumat verib.
İki günlük seminarda insan alveri ilə mübarizənin müxtəlif aspektlərinə dair Türkiyə, Almaniya, Bolqarıstan, Rumıniya, İsveçrə, Ukrayna, Moldova və Belarusun, İnterpolun, İnsan Hüquqları üzrə Avropa Məhkəməsinin nümayəndələrinin təqdimatları dinləniləcək, fikir və təcrübə mübadiləsi aparılacaq.