İQTİSADİYYAT


SOCAR Novruz bayramı münasibətlə keçirilən tədbiri Vətən müharibəsi qazilərinə həsr edib

Bakı, 19 mart, AZƏRTAC

Martın 19-da SOCAR Towerdə “Qələbədən sonra Novruz Qarabağda” şüarı ilə tədbir keçirilib.

Şirkətdən AZƏRTAC-a bildirilib ki, Novruz bayramı münasibətilə keçirilən tədbir Vətən müharibəsində iştirak etmiş SOCAR əməkdaşlarına həsr olunub. Tədbirdə, həmçinin ötən il sentyabrın 20-da orden və medallarla təltif olunmuş neftçilərə dövlət mükafatları təqdim edilib. SOCAR-ın 21 idarəsindən onlayn qoşulma vasitəsi ilə ümumilikdə 500-dək SOCAR əməkdaşının iştirak etdiyi tədbirdə, ilk olaraq, şəhidlərimizin əziz xatirəsi bir dəqiqəlik sükutla yad olunub.

SOCAR-ın prezidenti Rövnəq Abdullayev çıxışında Qarabağ torpaqları işğal edildikdən sonra Azərbaycan dövlətinin uzun müddət məsələnin sülh yolu ilə həllinə tərəfdar olduğunu vurğulayıb: “Prezident İlham Əliyev dəfələrlə çox yüksək tribunalardan dövlətimizin haqlı mövqeyini beynəlxalq ictimaiyyətə çatdırarkən həmişə bəyan edirdi ki, biz müharibə istəmirik, biz düşmənçiliyə son qoymaq istəyirik. Biz Qafqazda sülh və əməkdaşlıq şəraitində yaşamaq istəyirik. Amma bu o demək deyil ki, torpaqlarımız işğal altında qalmalıdır. Azərbaycan neftçiləri də Azərbaycan Prezidentinin bu çıxışlarının ruhuna uyğun olaraq heç vaxt müharibə istəməyib, şirkətimiz daim sülhü təbliğ edib”.

R.Abdullayev Ermənistan tərəfinin və onun havadarlarının öz məkrli əməllərindən əl çəkmədiklərini, beləliklə də Azərbaycan Ordusunu əks-hücum əməliyyatlarına vadar etdiyini söyləyib, Vətən müharibəsində Azərbaycanın qazandığı parlaq Qələbənin tarixi əhəmiyyətindən söz açaraq deyib: “Müharibə günlərində xalqımız arxa cəbhədə böyük əzmkarlıqla çalışmış, Müzəffər Ali Baş Komandan İlham Əliyevin qətiyyətli rəhbərliyi ilə Milli Ordumuzun rəşadətli hərbi yürüşünə layiqli töhfələr verib. Bütün xalqımız kimi, SOCAR-ın əməkdaşları da müxtəlif ictimai aksiyalarda yüksək fəallıq nümayiş etdiriblər. Amma əsl igidliyi və hünəri, əlbəttə ki, müharibənin ilk günlərindən döyüş əməliyyatlarında bilavasitə iştirak edən əməkdaşlarımız, qazilərimiz göstəriblər. Onlar və onların ailə üzvləri ilk günlərdən bütün SOCAR kollektivinin xüsusi qayğısı ilə əhatə olunub.”

Görüşdə Vətən müharibəsi iştirakçılarına və əmək cəhbəsində xüsusi fəallığı ilə fərqlənən ümumilikdə 611 əməkdaşın Fəxri fərmanla təltif edildiyi bildirilib, onların bir qrupuna mükafatlar təqdim edilib.

Qazilərdən “Neft Daşları” neft və qazçıxarma idarəsinin (NQÇİ) böyük energetiki Vüsal Kərimov, Tərtər rayon qaz istismar idarəsinin texniki Yadigar Əlizadə, Qaz İxrac İdarəsinin Astara MQKS-nin hüquq məsləhətçisi Rəşad Həsənov və Karbamid zavodunun mühafizə sistemlərinə nəzarət və buraxılış şöbəsinin mühəndisi Samir Əsgərov çıxış edərək göstərilən qayğı və diqqətə görə minnətdarlıqlarını bildirib, keçdikləri döyüş yolundan danışıblar. Azərbaycan Respublikası Prezidentinin Sərəncamına əsasən, 3-cü dərəcəli “Əmək” ordeni ilə təltif edilmiş SOCAR-ın “Neftqaztikinti” trestinin qaynaqçısı Arif Zeynalov bu ali mükafatı dövlət səviyyəsində neftçi əməyinə göstərilən yüksək münasibətin bariz təzahürü kimi qiymətləndirib.

Tədbirdə Prezident İlham Əliyevin bayram təbriklərini neftçilərə çatdıran R.Abdullayev dövlət başçısının tapşırığına əsasən, ötən il Neftçilər günü ərəfəsində Vətənin ali mükafatlarına layiq görülmüş neftçilərə orden və medalları təqdim edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.