Qalib ordu sıralarına daxil olan gənc əsgərlər hərbi and içiblər VİDEO
Beyləqan, 8 avqust, Aydın Yavərzadə, AZƏRTAC
Qalib ordu sıralarına qoşulan gənc əsgərlər hərbi and içiblər. Beyləqanda yerləşən N saylı hərbi hissələrdə andiçmə mərasimi keçirilib. Əsgərlər onlara əmanət olunan Vətən torpağını göz bəbəyi kimi qoruyacağına və dövlətə sadiq olacağına söz veriblər.
AZƏRTAC-ın bölgə müxbiri xəbər verir ki, mərasimdə hərbi birlik nümayəndələri, Birinci və İkinci Qarabağ müharibəsi veteranları iştirak ediblər. Əvvəlcə şəhidlərimizin xatirəsi bir dəqiqəlik sükutla yad olunub, Dövlət Himni səsləndirilib. Silahlı qüvvələrin polkovniki İdris Məhərrəmov şəxsi heyəti salamlayaraq onları şərəfli və əlamətdar gün münasibətilə təbrik edib. Bildirilib ki, hər bir əsgər, zabit, gizir ordu sıralarına daxil olarkən Vətənə, xalqa, dövlətə sadiq olacağına and içir. Bunun nəticəsidir ötən ilin sentyabrında Ali Baş Komandanın rəhbərliyi ilə Ordumuzun Zəfər yürüşü hərb tarixində əsl qəhrəmanlıq dastanı olaraq gələcək nəsillərə miras oldu. Otuz illik vətən həsrətinə son qoyularaq işğal atlında olan torpaqlarımız azad edildi və şanlı Azərbaycan Ordusu düşməni darmadağın edərək onları məğlubiyyətə düçar etdi.
Qarabağ Əlilləri, Şəhid Ailələri və Veteranlar Şurasının sədri Rövşən Namazəliyev çıxışında bildirib ki, əsası 1918-ci ildə qoyulan Azərbaycan Ordusunun çətin və şərəfli bir ömür yolu var. “1993-cü ildə ulu öndər Heydər Əliyev hakimiyyətə gəldikdən sonra Azərbaycan Ordusu güclənməyə başladı və ilk uğurlu Horadiz əməliyyatı nəticəsində bir sıra kəndlərimiz işğaldan azad edildi. Daha sonra ölkə iqtisadiyyatı kimi ordu quruculuğuna xüsusi diqqət edildi. Ulu Öndərin davamçısı Ali Baş Komandan İlham Əliyevin rəhbərliyi altında Azərbaycan Ordusunun müasir silahlarla təmin edilməsi və ixtisaslı zabitlərin yetişdirilməsi Ordumuzun gücünü daha da artırdı. Ötən dövrlərdə düşmən təxribatlarının qarşısı qətiyyətlə alındı. Ötən il sentyabrın 27-də yenidən təxribat törətməyə çalışan ermənilərə qarşı Ali Baş Komandanın rəhbərliyi altında Ordumuzun əks-hücuma keçməsi nəticəsində isə işğalda olan torpaqlarımız azadlığa qovuşdu. Bu şərəfli ənənənə isə indi gənc əsgərlərə həvalə olunur. Bu şərəfli yolda gənc əsgərlərə uğurlar arzulayıram”, - deyə Rövşən Namazəliyev qeyd edib.
Daha sonra gənc əsgərlər Vətənə, dövlətə, xalqa sadiq olacağına, torpaqlarımızın bütövlüyü uğrunda canını, qanını əsirgəməyəcəklərinə, şərəflə xidməti vəzifələrini yerinə yetirəcəklərinə, komandirlərin əmrlərinə sözsüz əməl edəcəklərinə görə hərbi and içiblər. Həmçinin gənc əsgərlər sıra düzülüşü ilə hərbi keçiddə iştirak ediblər.
Qalib ordu sıralarına qoşulduğu ilə fəxr etdiyini söyləyən gənc əsgər Ruslan Əliyev bildirib ki, bu şərəfli anı yaşamaq hər bir kəs üçün qürurverici bir hissdir. “Ali Baş Komandanın rəhbərliyi altında müzəffər Ordumuz 44 günlük Vətən müharibəsində torpaqlarımızı işğaldan azad edib. Buna görə də dayandığımız bu sıralar hər bir gənc əsgər üçün müqəddəsdir və bu şərəfli yolu davam etdirmək hər an əldə silah vətən keşiyində dayanmaq biz əsgərlərin əsas vəzifə borcudur”, - deyə Ruslan Əliyev bildirib.
Gənc əsgər Kənan Allahyarov deyib ki, Azərbaycanın qalib ordusuna daxil olaraq and içmək qürurverici hissdir: “İndi Vətən müharibəsi qəhrəmanları olan zabit, gizir və əsgərlərlə birlikdə xidmətə başlamaq ən şərəfli bir yola addım atmaq deməkdir”. Birinci Qarabağ müharibəsi veteranının övladı olduğunu deyən Kənan indi Azərbaycana layiqli bir əsgər olacağı söz verib.
Gənc əsgər İlkin Süleymanov bildirib ki, qalib ordu sıralarında xidmətə başlamaq, hərbi andı qəbul etmək qürurverici bir duyğudur. “Hər bir dövlətin güclü ordusu olmalıdır ki, bizim də Ali Baş Komandanın rəhbərliyi altında vətən keşiyində dayan qüdrətli Ordumuz var. Yenilməz Ordumuz bir daha bunu sübut edərək 30 illik həsrətə son qoydu. Haqq döyüşü yolunda torpaqlarımızın azadlığı uğrunda öz canını sipər edərək şəhadətə yüksələn qardaşlarımıza rəhmət, qazilərimizə isə şəfa diləyirəm. Onların bizə əmanət etdiyi bu şərəfli yolu davam etdirmək biz gənc əsgərlərin müqəddəs borcudur”, - deyə İlkin Süleymanov bildirib.
Gənc əsgər Hüseyn Ələsgərov söyləyib ki, əsası 1918-ci ildə qoyulan qüdrətli Azərbaycan Ordusunun sıralarında and içmək fərəh hissidir. “Bizim dayandığımız bu sıralarda daha öncə xidmət edən qardaşlarımız 44 günlük döyüşdə əsl qəhrəmanlıq nümayiş etdirdilər. İndi onların yerlərində dayanmaq biz gənc əsgərlər üçün şərəfdir. Biz qəhrəman Azərbaycan Ordusunun işğaldan azad etdiyi torpaqlarda xidmət etməyi, vətən keşiyində şərəflə dayanmağı özümüzə borc bilirik”.
Daha sonra hərbi hissədə şəxsi heyət üçün yaradılan şəraitə baxış keçirilib.
Bölmənin digər xəbərləri
