20 Yanvar şəhidlərinin xatirəsi ürəklərdə yaşayır
Bakı, 18 yanvar, AZƏRTAC
Bakı Dövlət Universitetində (BDU) 20 Yanvar faciəsinin 28-ci ildönümünə həsr olunmuş tədbir keçirilib.
AZƏRTAC xəbər verir ki, əvvəlcə tədbir iştirakçıları BDU-nun həyətindəki “Şəhidlər” abidəsinin önünə gül dəstələri düzüb, şəhidlərin xatirəsini ehtiramla yad ediblər.
BDU-nun rektoru, akademik Abel Məhərrəmov 1990-cı il yanvarın 19-dan 20-nə keçən gecə keçmiş sovet ordusunun Bakıda və ölkəmizin digər şəhər və rayonlarında törətdiyi qanlı hadisələrdən bəhs edib. Bildirilib ki, o müdhiş gecədə günahsız insanların qanı axıdılıb, azadlıq və müstəqillik yolunda qəhrəman Vətən övladları canlarından keçiblər.
Qeyd olunub ki, 20 Yanvar tariximizin qanlı, həm də şanlı səhifəsidir.
20 Yanvar qırğınının imperiya rəhbərliyinin xalqımıza qarşı cinayətkar əməlləri olduğunu deyən rektor, bu hadisənin heç vaxt qan yaddaşımızdan silinməyəcəyini vurğulayıb.
Akademik A.Məhərrəmov 20 Yanvar hadisələri ilə əlaqədar ümummilli lider Heydər Əliyevin Azərbaycanın Moskvadakı daimi nümayəndəliyinə gələrək mətbuat konfransında bəyanatla çıxış etdiyini və günahsız insanlara qarşı törədilən bu amansız qətliama qarşı kəskin etirazını bildirdiyini, cinayətkarların cəzalandırılmasını qətiyyətlə tələb etdiyini diqqətə çatdırıb. Vurğulanıb ki, dahi rəhbər Heydər Əliyevin 1993-cü ildə xalqın təkidli tələbi ilə hakimiyyətə qayıdışından sonra 20 Yanvar hadisələrinə siyasi-hüquqi qiymət verilib.
Rektor qəsbkar ermənilər tərəfindən işğal olunmuş torpaqlarımızın Prezident İlham Əliyevin apardığı məqsədyönlü siyasət nəticəsində tezliklə azad olunacağına əminliyini bildirib.
Akademik Vasim Məmmədəliyev Qara Yanvarın dəhşətlərindən danışıb, şəhidlərin xatirəsinin əbədiyaşar olduğunu vurğulayıb.
Professor İzzət Rüstəmov 20 Yanvarda Vətən övladlarının azadlıq, müstəqillik uğrunda göstərdikləri qəhrəmanlıqlardan bəhs edib, bu hadisənin tariximizdə silinməz izlər qoyduğunu söyləyib.
Professor ölkəmizdə şəhid ailələrinə göstərilən dövlət qayğısından bəhs edib.
Bölmənin digər xəbərləri
