20 Yanvar xalqımızın azadlıq mübarizəsi tarixində mühüm yer tutur
Ağcabədi, 18 yanvar (AZƏRTAC). Ağcabədi Rayon Mərkəzi Kitabxanasında 20 Yanvar faciəsinin 24-cü ildönümünə həsr olunmuş “20 Yanvar qürur günümüzdür” adlı anım tədbiri keçirilmişdir.
AZƏRTAC xəbər verir ki, tədbir iştirakçıları əvvəlcə Şəhidlər xiyabanına gələrək şəhidlərin məzarları üzərinə çiçək dəstələri düzmüş, ölkəmizin müstəqilliyi və ərazi bütövlüyü uğrunda canından keçmiş Vətən övladlarının xatirəsinə ehtiramlarını bildirmişlər.
Tədbir iştirakçıları daha sonra kitabxanada 20 Yanvar faciəsindən bəhs edən foto və kitab sərgisi ilə tanış olmuşlar.
Mədəniyyət işçilərinin, ziyalıların, şəhər incəsənət məktəbi və rəsm qalereyası kollektivlərinin iştirak etdikləri tədbirdə 1990-cı il yanvarın 19-dan 20-nə keçən gecə sovet qoşunlarının Bakıda törətdikləri qanlı cinayətlərdən söhbət açılmış, bu hadisələrin xalqımızın azadlıq mübarizəsi tarixində mühüm yer tutduğu qeyd olunmuşdur.
Mərasimdə məktəblilərin ifasında ədəbi-bədii kompozisiya nümayiş etdirilmiş, faciəyə həsr olunmuş videoslayd göstərilmişdir.
Bölmənin digər xəbərləri
