“XƏZƏR-LƏNKƏRAN” “DİNAMO”YA LAYİQLİ MÜQAVİMƏT GÖSTƏRƏCƏKDİR
AZƏRTAC xəbər verir ki, iyulun 17-də Çempionlar Liqası turnirinin birinci təsnifat mərhələsi çərçivəsində “Xəzər-Lənkəran” Bakıda Xorvatiyanın “Dinamo” (Zaqreb) klubunu qəbul edəcəkdir.
Bununla bağlı iyulun 16-da Tofiq Bəhramov adına Respublika stadionunda hər iki klubun baş məşqçisinin iştirakı ilə mətbuat konfransı keçirilmişdir.
“Dinamo” klubunun çalışdırıcısı Branko İvankoviç “Xəzər-Lənkəran”ın səviyyəli futbolçulardan təşkil olunduğunu söyləmişdir. Azərbaycan futbolu haqqında kifayət qədər məlumatı olduğunu deyən B.İvankoviç oyuna çox ciddi yanaşdıqlarını və meydana yalnız qələbə üçün çıxacaqlarını vurğulamışdır.
“Xəzər-Lənkəran” klubunun baş məşqçisi Ağasəlim Mircavadov isə komandanın bir neçə itki ilə üzləşdiyini söyləmişdir. Belə ki, klubun aparıcı oyunçularından sayılan Vüqar Nadirov zədəli olduğundan görüşdə iştirak edə bilməyəcəkdir. Hücum və yarımmüdafiə xətlərində də problemlərin olmasına baxmayaraq, təcrübəli mütəxəssis rəqibdən çəkinmədiklərini söyləmişdir. “Dinamo”nun kifayət qədər güclü komanda olduğunu deyən A.Mircavadov yetirmələrinin rəqibə layiqli müqavimət göstərəcəyinə inandığını bildirmişdir.
Bölmənin digər xəbərləri
