Aprel döyüşlərinin qəhrəmanı Böyük Çin səddində VİDEO
Pekin, 9 noyabr, AZƏRTAC
Vətən müharibəsində qazanılmış Zəfərinin 5-ci ildönümü qeyd etdiyimiz bu günlərdə ölkəmizin Çindəki səfirliyində Aprel döyüşlərinin iştirakçısı, “Vətən uğrunda” medalı ilə təltif olunmuş ehtiyatda olan polkovnik-leytenant Vüqar Abduləzimov ilə Çində təhsil alan azərbaycanlı tələbələrin bir qrupu arasında görüş olub.
AZƏRTAC xəbər verir ki, V.Abduləzimov gənclərə Azərbaycan ordusunun keçdiyi şərəfli döyüş yolundan, əsgər və zabitlərinin Vətən sevgisindən danışıb. Qeyd edib ki, bədnam qonşularımız 1990-cı illərin əvvəlində Azərbaycandakı gərgin ictimai-siyasi, sosial-iqtisadi vəziyyətdən yararlanmaqla, xarici qüvvələrin böyük dəstəyi ilə Azərbaycan Respublikasının ərazisinin 20 faizini işğal edərək, etnik təmizləmə aparıb, mədəni, tarixi və dini abidələr dağıdıblar. Onlar elə düşünürdülər ki, bu işğal əbədi olacaq. Amma Ümummilli Lider Heydər Əliyevin uzaqgörən siyasəti, dövlətçilik bacarığı sayəsində Azərbaycan uçurumun kənarından geri dönərək, bütün sahələrdə, o cümlədən ordu quruculuğu sahəsində inkişafa başladı. Ulu Öndərin layiqli davamçısı Prezident İlham Əliyevin diqqət və qayğısı sayəsində Azərbaycan Silahlı Qüvvələri ən müasir silah və texnika ilə təmin olundu, hərbçilərimizin peşəkarlığının, döyüş bacarığının yüksəldilməsi üçün davamlı işlər görüldü.
Ehtiyatda olan zabit Azərbaycan ordusunun 2016-cı ilin Aprel döyüşlərində düşmənə vurduğu sarsıdıcı zərbədən danışıb. Bildirib ki, Aprel döyüşlərində igid hərbçilərimiz erməni tərəfinin keçilməz sədd adlandırdığı “Ohanyan xətti”ni cəmi 40 dəqiqəyə yarıb keçib. Azərbaycan ordusu aprel hadisələrində əldə etdiyi döyüş təcrübəsini 2020-ci ildə Vətən müharibəsində istifadə edərək, böyük qələbə əzmi ilə cəmi 44 gün ərzində xeyli ərazini, o cümlədən Qarabağın tacı olan Şuşanı azad edərək düşməni təslim olmağa məcbur etdi.
V..Abduləzimov bildirib ki, Aprel döyüşlərində geri aldığımız postlarda kəşfiyyat tapşırıqları yerinə yetirərkən minaya düşüb, sol ayağı dizdən aşağı amputasiya olunub. Uzunmüddətli müalicədən sonra müasir protezlə təmin olunaraq, Silahlı Qüvvələrin Təlim və Tədris Mərkəzində gənc hərbçilərə təlim keçməklə məşğul olub.
Qazi dünyanın müxtəlif yerlərində təhsil alan gəncləri Vətən sevgisini daim uca tutmağı, nümunəvi tələbə olmağı, Azərbaycanın adını hər yerdə uca tutmağı tövsiyə edib.
Sonra V.Abduləzimov tələblərlə birlikdə Çin səddinə baş çəkib.
Qeyd edək ki, Azərbaycan xalqı haqlı olaraq Qarabağ zəfərinin sevincini, qürurunu yaşayır. 30 ilə yaxın işğal altında olan torpaqlarımız, dağıdılan, viran qoyulan yurdumuz Müzəffər Ali Baş Komandan, Prezident İlham Əliyevin müdrik rəhbərliyi, xalqımızın həmrəyliyi, əsgər və zabitlərimizin fədakarlığı, qəhrəmanlığı, peşəkarlığı sayəsində işğaldan azad olunub. Vətən müharibəsi təkcə ərazilərimizin azad olunması, ədalətin bərqərar olunması, beynəlxalq hüququn təmin edilməsi deyildi, həm də Azərbaycan xalqının ləyaqətinin, qürurunun bərpası idi. Bu yolda neçə-neçə igid canından keçdi, sağlamlığından oldu. Onların qəhrəmanlığı, cəsarəti, fədakarlığı gənc nəsil üçün nümunədir. Azərbaycanın ərazi bütövlüyünün bərpası uğrunda döyüşlərdə iştirak edən, qəhrəmanlıq göstərən hərbçilərlə, şəhid ailələri ilə görüşlər gənclərin vətənpərvərlik ruhunda yetişməsi, onlara Vətənə, dövlətə sədaqət hissinin aşılanması baxımından son dərəcə önəmlidir.
AZƏRTAC-ın xüsusi müxbiri
Pekin
Bölmənin digər xəbərləri
