Fransada həyəcan siqnalı: “Rafale” qırıcısı əmrə tabe olmayan təyyarəyə görə havaya qalxıb
Paris, 4 iyun, AZƏRTAC
Venesiyadan Alikanteyə uçan ultrayüngül təyyarə Fransa hava məkanında qeyri-adi davranış sərgilədikdən və dispetçerlərin göstərişlərinə əməl etmədikdən sonra hərbi müdaxilə həyata keçirilib.
AZƏRTAC xəbər verir ki, Fransa hava qüvvələri şübhəli davranış nümayiş etdirən mülki təyyarəni yoxlamaq üçün “Rafale” qırıcısını havaya qaldırıb.
Vəziyyət qiymətləndirildikdən sonra, daxili təhlükəsizlik qüvvələri ilə koordinasiyalı şəkildə təyyarənin Monpelye hava limanına endirilməsi qərara alınıb.
Təyyarə Monpelyedə yerə endikdən sonra ekipaj səlahiyyətli qurumların nəzarətinə götürülüb. Hadisənin səbəbləri və pilotun niyə dispetçerlərin göstərişlərinə əməl etmədiyi ilə bağlı araşdırma aparılır.
Fransa dünyanın ən çox istifadə olunan hava məkanlarından birinə malikdir. Rəsmi məlumatlara görə, hər gün ölkə üzərindən təxminən 12 min hava gəmisi keçir.
Bölmənin digər xəbərləri
