Təsərrüfatbaşına uçot sənədlərinin tətbiqinə dair zona müşavirələri keçirilib VİDEO
Şəmkir, 16 may, Famil Quliyev, AZƏRTAC
Mayın 16-da Şəmkir Rayon Əhməd Cavad adına Mədəniyyət Mərkəzində kənd inzibati ərazi dairələri üzrə yeni təsərrüfatbaşına uçot sənədlərinin tətbiqinə dair zona müşavirəsi keçirilib.
Dövlət Statistika Komitəsi və Prezident Administrasiyasının regional idarəetmə və yerli özünüidarəetmə orqanları ilə iş şöbəsinin birgə təşkilatçılığı ilə keçirilən müşavirələrin məqsədi Dövlət Statistika Komitəsi tərəfindən hazırlanmış yeni təsərrüfatbaşına uçot sənədlərinin tətbiqi və aparılması ilə bağlı məsul şəxslərin təlimatlandırılmasıdır.
AZƏRTAC xəbər verir ki, müşavirədə Şəmkir, Gədəbəy, Tovuz, Qazax və Ağstafa rayonlarının icra hakimiyyəti başçılarının müavinləri, kənd inzibati ərazi dairələri üzrə nümayəndələri, yerli statistika orqanlarının rəhbərləri, uçot sənədlərinin aparılmasına məsul olan şəxslər iştirak ediblər.
Müşavirəni giriş sözü ilə açan Şəmkir Rayon İcra Hakimiyyətinin başçısı Alimpaşa Məmmədov rayonda görülən abadlıq və quruculuq işlərindən danışıb.
Müşavirədə çıxış edən Dövlət Statistika Komitəsi sədrinin müavini Yüsif Yüsifov Azərbaycanda kənd təsərrüfatının inkişafında ümummilli lider Heydər Əliyevin xidmətlərini xatırladıb. Hazırda aqrar sahədə aparılan islahatlardan danışan natiq vurğulayıb ki, Ulu Öndərin kənd təsərrüfatı ilə bağlı siyasəti bu gün Prezident İlham Əliyev tərəfindən uğurla davam etdirilir. Ölkədə qeyri-neft sektorunun inkişafına xüsusi önəm verilir. Son on ildə kənd təsərrüfatının inkişaf etdirilməsi ilə bağlı 80-dən artıq sərəncam və fərmanların verilməsi bunun bariz nümunəsidir.
Diqqətə çatdırılıb ki, kənd təsərrüfatının inkişafında statistik uçotun təkmilləşdirilməsi də mühüm əhəmiyyət kəsb edir. Azərbaycan Prezidenti İlham Əliyev ölkənin bütün iqtisadi sahələri, o cümlədən kənd təsərrüfatı üzrə statistik uçotun təkmilləşdirilməsini qarşıya vacib vəzifə kimi qoyub. Dövlətimizin başçısının tapşırıqlarına əsasən Dövlət Statistika Komitəsi tərəfindən zəruri islahatlar həyata keçirilir, beynəlxalq təcrübə öyrənilərək statistika sisteminin inkişafı üçün müvafiq tədbirlər görülür. Bu istiqamətdə aparılan irihəcmli işlərdən biri də kənd təsərrüfatı statistikasının təşkili üçün mühüm informasiya mənbəyi olan və kənd yaşayış məntəqələri üzrə hər bir təsərrüfat haqqında geniş məlumat almaq imkanı verən təsərrüfatbaşına uçot sənədlərinin təkmilləşdirilməsidir.
Tədbirdə yeni təsərrüfatbaşına uçot sənədlərinin məqsədi və əhəmiyyəti haqqında məlumat verilib. Qeyd olunub ki, bu sənədlərin vaxtında və yüksək keyfiyyətlə tətbiq edilməsi kənd təsərrüfatının və ölkə iqtisadiyyatının inkişafına dair qərarların qəbulu üçün dəqiq məlumatların hazırlanmasına imkan verəcək, hər bir təsərrüfat üzrə məlumatların toplanması dövlət dəstəyinin daha ünvanlı şəkildə göstərilməsinə yardım edəcək. Məlumatların birbaşa mənbədən əldə edilməsi, eyni zamanda, ölkə əhalisinin ərzaq məhsulları ilə təminat səviyyəsinin daha ətraflı öyrənilməsinə, rəqabət qabiliyyətli məhsulların müəyyən olunmasına, ölkənin ixracat potensialının qiymətləndirilməsinə imkan verəcək.
Müşavirə iştirakçıları yeni uçot sənədlərinin tətbiqinin digər üstünlükləri barədə də məlumatlandırılıb.
Bildirilib ki, növbəti mərhələdə nəzərdə tutulan tədbirlərə uçot sənədlərinin elektronlaşdırılması, hər bir təsərrüfat üzrə məlumat bazasının yaradılması, sənədlərdə baş verən düzəlişlərin elektron qeydiyyatının və avtomatik rejimdə regionlararası müqayisələrin aparılması daxildir. Uçot sənədlərinin məlumatları statistika orqanlarında və digər aidiyyəti dövlət qurumlarında mövcud olan məlumat bazalarına inteqrasiya olunacaq, statistika orqanlarına təqdim edilmiş müxtəlif statistika hesabatlarının məlumatlarının dürüstlüyünün yoxlanılmasında istifadə olunacaq. Bu məlumatlardan kənd təsərrüfatı və əhali siyahıyaalınmalarında, eləcə də seçici siyahılarının dəqiqləşdirilməsində istifadə ediləcək.
Prezident Administrasiyasının məsul işçisi Əlibaba Əliyev çıxış edərək yeni təsərrüfatbaşına uçot sənədlərinin tətbiqi və aparılması ilə bağlı tapşırıq və tövsiyələrini verib.
Müşavirlərdə kənd inzibati ərazi dairələri üzrə təsərrüfatbaşına uçot sənədlərinin tərtibi qaydalarını əks etdirən slaydlar nümayış olunub, tədbir iştirakçılarını maraqlandıran çoxsaylı suallar cavablandırılıb.
X X X
Mayın 16-da Şamaxı, Qəbələ və Göygöldə də kənd inzibati ərazi dairələri üzrə təsərrüfatbaşına uçot sənədlərinin tətbiqinə dair zona müşavirələri keçirilib.
Şamaxı, Qobustan, Ağsu, Qəbələ, İsmayıllı, Oğuz, Göygöl, Daşkəsən, Samux və Kəlbəcər rayonlarının yerli icra hakimiyyəti başçılarının müavinlərinin, kənd inzibati ərazi dairələri üzrə nümayəndələrinin, yerli statistika idarələrinin rəhbərlərinin, uçot sənədlərinin aparılmasına məsul olan şəxslərin iştirakı ilə keçirilən müşavirələrdə Dövlət Statistika Komitəsi sədrinin müavinləri Rauf Səlimov, Yusif Yusifov, Prezident Administrasiyasının məsul işçiləri Rüfət Məmmədov, Rüfət Əliyev və Arif Novruzov çıxış ediblər.
Müşavirələrdə Şamaxı Rayon İcra Hakimiyyətinin başçısı Asif Ağayevin, Qəbələ Rayon İcra Hakimiyyətinin başçısı Səbuhi Abdullayevin, Göygöl Rayon İcra Hakimiyyətinin başçısı Arif Seyidovun mövzu ilə bağlı çıxışları dinlənilib.
Bölmənin digər xəbərləri
