MƏDƏNİYYƏT
AZƏRBAYCANLI REJİSSORUN ESTONİYADA BÖYÜK UĞURU
AZƏRTAC “Yuğ” Dövlət Teatrına istinadla xəbər verir ki, Estoniyanın Vilyandi şəhərindəki Uqala Teatrında Kamal Abdullanın “Kim dedi ki, Simurq quşu varmış” əsəri əsasında Azərbaycanın gənc rejissoru Gümrah Ömərin quruluşunda səhnələşdirilmiş “Gəlsin o kəslər ki…” adlı tamaşanın premyerası böyük uğurla keçmişdir. Milli özəlliklərlə zəngin olan əsərin eston teatrsevərləri tərəfindən düzgün başa düşülməsindən ötrü rejissor tərəfindən adaptasiya edilərək tamaşanın adı “iki ölçüdə Şərq melodramı” kimi təqdim olunmuşdur.
Premyeradan əvvəlki daxili baxışda 7 nəfərdən ibarət teatrşünas və tənqidçi iştirak etmişdir. Onların arasında ən görkəmliləri - qocaman teatrşünas Liliayn Vellerand, Rait Avestik, “Gündüz” qəzetinin teatr icmalçısı Kristina Eberhard və elmlər doktoru, sənətşünas Enn Siimer yeni səhnə əsərinin çox maraqlı və eston teatrı üçün əlamətdar hadisə olduğunu vurğulamışlar.
“Yuğ” Dövlət Teatrı gənc rejissorunun səhnələşdirdiyi tamaşanın rəssamı Rəşid Şərif, musiqi tərtibatçıları həmyerlimiz Ramiq Mehdi və estoniyalı Peeter Kanavalovdur. Tamaşada əsasını Azərbaycan xalq mahnısı “Sarı gəlin” təşkil edən Qərb-Şərq musiqi kollajı səsləndirilir.
Eston dilində oynanılan tamaşada Estoniyanın hər üç nəslinin nümayəndələri - qoca, orta və cavan aktyorlar iştirak edirlər.
Xatırladaq ki, rejissor Gümrah Ömər Estoniyaya avqustun 6-da Azərbaycan Mədəniyyət və Turizm Nazirliyinin və Estoniyanın Kültür Kapital Fondunun dəstəyi ilə göndərilmişdir.