AzMİU-da işğaldan azad edilmiş ərazilərin ölkə iqtisadiyyatına reinteqrasiyasına dair konfrans keçirilir
Bakı, 13 iyun, AZƏRTAC
Azərbaycan Memarlıq və İnşaat Universitetində (AzMİU) Ulu Öndər Heydər Əliyevin anadan olmasının 100-cü ildönümü münasibətilə keçirilən tədbirlər planı çərçivəsində “İşğaldan azad edilmiş ərazilərin ölkə iqtisadiyyatına reinteqrasiyası: hədəflər və istiqamətlər” mövzusunda beynəlxalq elmi konfrans öz işinə başlayıb.
AzMİU-dan AZƏRTAC-a bildirilib ki, Biznesin iqtisadiyyatı və menecment kafedrasının təşkilatçılığı ilə keçirilən konfransda Azərbaycanın dövlət rəsmiləri, eləcə də özəl qurumlardan, ali təhsil ocaqlarından nümayəndələr, Türkiyə, Rusiya, Ukrayna, Makedoniyanın qabaqcıl universitetlərindən elm adamları iştirak edirlər.
Açılış nitqi ilə çıxış edən AzMİU-nun rektoru professor Gülçöhrə Məmmədova beynəlxalq konfransın işğaldan azad olunmuş ərazilərin iqtisadiyyatı ilə bağlı tədqiqatlara töhfə verəcəyini vurğulayıb. O, konfransın Qarabağ və Şərqi Zəngəzurun iqtisadi inkişafını, iqtisadi potensialının qiymətləndirilməsini, Azərbaycan Respublikasının siyasi, iqtisadi, sosial, mədəni həyatına qovuşmasını hədəflədiyini deyib. Rektor konfransın gələcək hədəflər və istiqamətlər üzrə mənbə formalaşdıracağını söyləyib.
Nazirlər Kabinetinin Sənaye və energetika məsələləri şöbəsinin müdiri professor Elşən Hacızadə, Sahibkarlar (İşəgötürənlər) Təşkilatları Milli Konfederasiyasının prezidenti professor Məmməd Musayev konfransın işğaldan azad olunmuş ərazilərin iqtisadiyyatında əhəmiyyətli rol oynayacağını qeyd ediblər.
Plenar iclasda Milli Məclisin deputatı, akademik Ziyad Səmədzadə “Şərqi-Zəngəzur və Qarabağ iqtisadi rayonlarının iqtisadi-sosial inkişafı: dünən, bu gün və perspektivlər”, Rusiya Federasiyasının Cənub Universitetinin rektoru professor İmran Əkbərov “Rəqəmsal şüur - ərazinin reinteqrasiyasında insan kapitalı amili”, İqtisadi İslahatların Təhlili və Kommunikasiya Mərkəzinin icraçı direktoru professor Vüsal Qasımlı “Böyük qayıdış: Strategiya və icra”, Azərbaycan Respublikası Elm və Təhsil Nazirliyinin İqtisadiyyat İnstitutunun baş direktoru professor Nazim Müzəffərli “Qarabağın müqayisəli iqtisadi üstünlükləri” mövzularında məruzə ilə çıxış ediblər.
Beynəlxalq konfrans 5 bölmədə 2 gün davam edəcək.
Bölmənin digər xəbərləri
