SİYASƏT


Azərbaycan-Cibuti əlaqələri inkişaf edir

Bakı, 3 may, AZƏRTAC 

Azərbaycan Respublikası Milli Məclisinin sədri Oqtay Əsədov mayın 3-də Cibuti Respublikası Milli Assambleyasının sədri Mohamed Əli Humədin başçılıq etdiyi nümayəndə heyəti ilə görüşüb.

AZƏRTAC xəbər verir ki, Oqtay Əsədov qarşılıqlı səfərlərin əlaqələrimizin inkişafına böyük töhfə verəcəyini qeyd edib. Bildirib ki, Cibuti Milli Assambleyası sədrinin Azərbaycana səfəri ölkələrimiz, xüsusilə parlamentlərimiz arasında münasibətlərin inkişafında yeni səhifələr açacaq. Milli Məclisin sədri qarşılıqlı münasibətlərin inkişafında dövlət başçılarının rolunu qeyd edərək bildirib ki, məhz iki ölkə rəhbərlərinin görüşündən sonra əlaqələrin inkişafı üçün münbit şərait yaranıb.

Oqtay Əsədov son illər ölkələrimiz arasında siyasi, humanitar, iqtisadi sahələrdə əlaqələrin inkişaf etdiyini söyləyib. Milli Məclisin sədri iqtisadi əməkdaşlığın daha da genişləndirilməsinin vacibliyini vurğulayıb. O, əminliyini bildirib ki, gələcəkdə ölkələrimiz arasında hökumətlərarası komissiya yaradılacaq, iqtisadi forumlar keçiriləcək. Bu da iki ölkə arasında iqtisadi inkişafa dəstək olacaq.

Azərbaycan Milli Məclisində Cibuti ilə parlamentlərarası dostluq qrupunun yaradıldığını deyən Oqtay Əsədov bildirib ki, gələcəkdə deputatların qarşılıqlı səfərləri həyata keçiriləcək, ölkələrimiz arasında əlaqələr daha sürətlə inkişaf edəcək.

Oqtay Əsədov Ermənistan-Azərbaycan, Dağlıq Qarabağ münaqişəsi barədə qonaqlara məlumat verib. O, beynəlxalq təşkilatlarda Azərbaycanı dəstəklədiyinə və Cibuti parlamentinin Xocalı soyqırımını tanımasına dair qəbul etdiyi qətnaməyə görə təşəkkürünü bildirib.

Oqtay Əsədov bu ay Bakıda keçiriləcək İslam Həmrəyliyi Oyunlarında iştirak edəcək Cibuti idmançılarına uğurlar arzulayıb.

Mohamed Əli Huməd Azərbaycana səfərindən məmnunluğunu ifadə edib. O, əminliyini bildirib ki, bu səfərlər iki ölkə arasında münasibətlərin inkişafına müsbət təsir göstərəcək. İki ölkənin parlamentlərinin yaratdığı dostluq qrupları əlaqələrin möhkəmlənməsində daha böyük rol oynayacaq.

Parlament sədri bildirib ki, Xocalı soyqırımı barədə qətnamə Cibuti Milli Assambleyası tərəfindən tərəddüdsüz qəbul edilib. “Biz qürur hissi duyuruq ki, bir müsəlman ölkəsi olaraq Azərbaycanın yanındayıq”, - deyən Mohamed Əli Huməd münaqişənin ədalətli həllinin vacibliyini vurğulayıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.