Cəlal Abbasovun yaradıcılığına həsr olunmuş müəllif konserti olmuşdur
Bakı, 23 may (AZƏRTAC, Tərgül Ağayeva). Mayın 23-də Azərbaycan Bəstəkarlar İttifaqında (ABİ), Əməkdar İncəsənət Xadimi Cəlal Abbasovun yaradıcılığına həsr olunmuş müəllif konserti olmuşdur.
AZƏRTAC xəbər verir ki, konsertdə ABİ-nin sədri, Xalq Artisti, professor Firəngiz Əlizadə çıxış edərək Cəlal Abbasovun yaradıcılığı və yüksək insani keyfiyyətlərindən söz açmışdır.
Tədbirdə ABİ-nin katibi, musiqişünas, Əməkdar İncəsənət Xadimi Zemfira Qafarovanın “ Bəstəkar Cəlal Abbasovun yaradıcılığı haqqında” adlı məruzəsi dinlənilmişdir.
Məruzəçi bildirmidir ki, C.Abbasov müxtəlif janrlarda bəstələnmiş bir çox əsərlərin müəllifidir. Əsərləri ABŞ, Almaniya, Fransa, Koreya, Rusiya və digər ölkələrdə ifa olunmuş, tamaşaçıların böyük rəğbətini qazanmışdır. 1990-cı ildə III simfoniya və “Bahar mərasimi” kontatasına görə Azərbaycan Gənclər İttifaqının mükafatına, 1998-ci ildə isə IV simfoniyasına görə BMT-nin mükafatına layiq görülmüşdür.
Qeyd edilmişdir ki, bəstəkarın əsərləri “Music Fabrik”, “Sovetskiy Kompozitor”, “İşıq” və başqa nəşriyyatlar tərəfindən nəşr olunmuşdur.
Konsertdə bəstəkarın “Sonata”, “Paradeigma-2”, “Variasiyalar”, “Ay İşığında” və s. əsərləri səsləndirilmişdir.
Konsert maraqla qarşılanmışdır.
Bölmənin digər xəbərləri
