ELDAR ŞAMI DÖVLƏT TƏBİƏT QORUĞUNA DİQQƏT ARTIRILMALIDIR

27.12.2006 [22:21]
Çap et
A⁺ A^-

Samux rayonu ərazisində yerləşən Eldar şamı meşələri dəniz səviyyəsindən 400-600 metr yüksəklikdə yerləşir və “Ellər oyuğu” adlanan dağ silsiləsində 392 hektar sahəni əhatə edir. Təbii halda bitən Eldar şamının vətəni olan bu nadir sahə Qafqaz təbiətində ilk dəfə 1910-cu ildə Eldar şamı meşələri qoruq ərazisi elan edilmişdir. Eldar şamı meşələri uzun illər 100 kilometr aralıda yerləşən Göygöl Dövlət Təbiət Qoruğunun filialı kimi fəaliyyət göstərdiyindən diqqətdən kənarda qalmışdı. Lakin Prezident İlham Əliyevin 2004-cü il 16 dekabr tarixli Sərəncamı ilə bu ərazinin sahəsi 1686 hektara çatdırılaraq Göygöl Dövlət Təbiət Qoruğunun tərkibindən ayrılmış və Eldar şamı Dövlət Təbiət Qoruğu elan edilmişdir.

Qoruqda görülən işlərin vəziyyəti ilə tanış olmaq məqsədi ilə respublika ekologiya və təbii sərvətlər naziri Hüseynqulu Bağırov bu günlərdə Samux rayonunda olmuşdur.

Ərazi ilə tanışlıqdan əvvəl nazir ümummilli liderimiz Heydər Əliyevin rayon mərkəzindəki abidəsini ziyarət etmiş, önünə tər qərənfillər qoyaraq ulu öndərə ehtiramını bildirmiş, Heydər Əliyev muzeyini gəzmişdir. Sonra nazir Eldar şamı Dövlət Təbiət Qoruğuna getmiş, burada tikilmiş yeni inzibati bina ilə tanış olmuşdur. Binanın otaqlarını gəzən nazir laboratoriyanın iş prinsipi ilə maraqlanmışdır.

Kütləvi informasiya vasitələri nümayəndələrinə müsahibə verən Hüseynqulu Bağırov bildirmişdir ki, Azərbaycan müstəqillik qazandıqdan sonra Eldar şamı meşələri bir çox xarici və yerli tədqiqatçı alimlərin diqqətini cəlb etmişdir. Nadir keyfiyyətləri ilə dünyada yeganə olan, quraqlığa və şaxtaya davamlı olan bu ağac növü təbiətin insanlara bəxş etdiyi ən gözəl nemətlərdəndir. Ölkəmizin başçısının haqlı olaraq bu ərazinin qorunması və öyrənilməsi məqsədi ilə verdiyi sərəncam yüksək qiymətləndirilməlidir.

Ərazini gəzən nazir Hüseynqulu Bağırov bundan sonra görüləcək işlərə dair bir sıra tapşırıqlar vermişdir.