Fransanın Ermənistana silahlar verməsi regionda qüvvələr balansını dəyişməyə yönəlib - Politoloq
Bakı, 13 may, AZƏRTAC
Fransa Cənubi Qafqazda yaranan yeni geosiyasi reallıqları qəbul etmək istəmir. Bəlkə də buna görə Fransanın Ermənistana silah təchizatını həyata keçirməsi üçün uzun müddətdir ki, müzakirələr aparılır. Eyni zamanda, ATƏT-in Minsk qrupu formatının iflasa uğramasından sonra Fransa hər bir vəchlə Ermənistana yardım etmək istəyini gizlətmir.
Bu fikirləri AZƏRTAC-a açıqlamasında politoloq İlyas Hüseynov söyləyib.
“Ermənistanın Fransada güclü lobbisi var, onlar da daxili siyasətə və qəbul olunan qərarlara təsir etmək iqtidarındadır. Digər tərəfdən Fransanın Ermənistandakı səfirliyi yanında yeni hərbi attaşenin təyin edilməsi birbaşa olaraq öldürücü və dağıdıcı silahların düşmən dövlətə verilməsinə yardım göstərəcək. Fransanın Ermənistandakı hərbi attaşesi isə bütün proseslərə nəzarət etmək səlahiyyətlərinə sahib olacaq”, - deyə politoloq bildirib.
O deyib ki, Avropa İttifaqının (Aİ) aparıcı dövlətlərindən biri kimi Fransanın öldürücü silahları Ermənistana verməsi həm də regionda qüvvələr balansını qarşı tərəfin xeyrinə dəyişməyə yönəlib. Fransanın bu addımı, həmçinin Ermənistandakı revanşizm əhvali-ruhiyyəsini yüksəldir, hazırkı status-kvonun dəyişdirilməsinə ümid yaradır, işğalçılıq prinsiplərini və separatizm meyillərini gücləndirir. Rəsmi Parisin bu davranışları, eyni zamanda, Cənubi Qafqazda yeni eskalasiya riskini artırır, beynəlxalq səviyyədə təhlükəsizliyin daha da zədələnməsinə gətirib çıxarır. Görünən odur ki, Fransa üçün nə regionun, nə də dünyanın təhlükəsizliyi önəmli deyil. Çünki Fransa işğalçı, eyni zamanda, Azərbaycana qarşı ərazi iddiaları ilə çıxış edən Ermənistana hərbi, siyasi dəstək verir.
“Azərbaycan Avropa İttifaqının bir çox dövlətləri ilə strateji tərəfdaşlıq münasibətlərinə malikdir. Fransanın Ermənistanı silahlandırması və ölkəmizə mənfi münasibət bəsləməsi Azərbaycanı qabaqlayıcı addımlar atmağa sövq edir. Paralel olaraq, ölkəmiz də Avropadakı strateji tərəfdaşlarına müasir silahların alınması üçün müraciət edə bilər.
Bölmənin digər xəbərləri
