Pilar Qarrido Klemente: Nəsiminin böyüklüyü onun nur saçan sözlərinin ilahi mənasındadır
Madrid, 21 noyabr, AZƏRTAC
Nəsimi irsinin, onun qəzəllərinin ötəri olmayan dəyərlərini ispan dilinə tərcümə etmək zəruridir, çünki humanizm konsepsiyası müasir dövrün ən mühüm məsələlərindən biridir.
Mursiya Universitetinin şərqşünaslıq və islamşünaslıq fakültəsinin müəllimi doktor Pilar Qarrido Klemente bu sözləri Azərbaycanın İspaniya Krallığındakı səfirliyi və İspaniya İslam Şurası tərəfindən təşkil edilmiş “İmadəddin Nəsimi və Azərbaycan humanizmi” mövzusunda konfrans çərçivəsində AZƏRTAC-a məxsusi müsahibəsində söyləyib.
P.Klementenin həmin konfransda “İslamda hərflər haqqında elm: İbn Massardan Nəsimiyə qədər” mövzusunda məruzəsinin əsas mahiyyəti bundan ibarət olub ki, Nəsimi humanizmi poeziya formasında təbliğ edirdi, çünki məhz poeziya insanın qəlbinə yol açmağa qabildir. Doktor P.Klemente böyük Azərbaycan şairi İmadəddin Nəsiminin yaradıcılığını təhlil edərkən ərəb, fars və yunan-latın məktəblərinin fəlsəfi baxışları arasında paralellər aparıb. Məruzədə qeyd edilib ki, Nəsimi İslam fəlsəfi təfəkkürünün təməl daşlarından biri olan hərflər haqqında elmin araşdırıcılarının parlaq nümayəndəsidir.
P.Klemente deyib ki, Nəsimi təliminin mahiyyəti hərflərdə şifrələnmiş ali həqiqətlərin öyrənilməsi yolu ilə reallığın dərk edilməsindən ibarətdir. Filosof Nəsiminin böyüklüyü onun nur saçan sözlərinin ilahi mənasındadır.
Nigar Cəfərli
AZƏRTAC-ın xüsusi müxbiri
Madrid
Bölmənin digər xəbərləri
