SİYASƏT
YENİ AZƏRBAYCAN PARTİYASI İDARƏ HEYƏTİNİN NÖVBƏTİ İCLASI KEÇİRİLMİŞDİR
Bakı, 29 yanvar (AZƏRTAC). Yanvarın 29-da Yeni Azərbaycan Partiyası (YAP) İdarə Heyətinin növbəti iclası keçirilmişdir.
İclasda YAP-ın 2009-cu ildə fəaliyyəti, qazanılmış uğurlar və qarşıda duran vəzifələr haqqında ətraflı fikir mübadiləsi aparılmışdır. Bildirilmişdir ki, YAP ölkənin ictimai-siyasi həyatında fəal iştirak etmiş, Prezident İlham Əliyevin uğurla davam etdirdiyi islahatlar və quruculuq proseslərinin ən yaxın iştirakçısı olmuşdur.
YAP ötən ilin ən mühüm siyasi hadisəsi – Azərbaycan Konstitusiyasına əlavələr və dəyişikliklərlə bağlı ümümxalq səsverməsi - referendumun və bələdiyyə seçkilərinin təşviqat, təbliğat kampaniyasının yüksək fəallıq şəraitində keçirilməsini təmin etmiş, partiyanın qələbələrlə dolu şərəfli tarixinə yeni səhifələr yazmışdır. Prezident, Yeni Azərbaycan Partiyasının sədri İlham Əliyevin partiyanın IV qurultayındakı nitqində irəli sürülən tezislərin və qarşıya qoyulan vəzifələrin gələcək fəaliyyətin müəyyənləşdirilməsində həlledici istiqamət olduğu bir daha vurğulanmışdır.
İclasda gündəliyə uyğun olaraq, YAP İdarə Heyətinin 2009-ci ildə fəaliyyəti ilə bağlı hesabat, partiyanın ümumi tərkibi, o cümlədən Gənclər Birliyinin və Qadınlar Şurasının 1 yanvar 2010-cu ilə olan statistik hesabatları və 2009-ci il üçün maliyyə hesabatı dinlənilmiş və təsdiq edilmişdir.
Statistik məlumata görə, 2009-ci ildə partiyaya 29 777 nəfər üzv qəbul olunmuş və 2010-cu il yanvarın 1-nə YAP üzvlərinin ümumi sayı 498 462 nəfərə çatmışdır. Qeyd olunmuşdur ki, partiya sıralarında gənclərin xüsusi çəkisi getdikcə artmış və 2009-ci ildə YAP-a qəbul olunanların 49,7 faizini gənc nəslin nümayəndələri təşkil etmişlər. Bütövlükdə partiya üzvlərinin 39,3 faizini, yəni 196 340 nəfərini gənclər, 43,5 faizini, yəni 217 243 nəfərini isə qadınlar təşkil etmişdir.
YAP İdarə Heyətinin iclasında partiyanın maliyyə hesabatı müzakirə və təsdiq edilmişdir. Hesabatda bildirilir ki, 2009-cu ildə YAP-ın üzvlük haqlarından cəmi mədaxili 2 milyon 915 min 505 manat olmuşdur. Hesabat ilində partiyanın ümumi xərcləri 2 milyon 374 min 176 manat olmuşdur ki, bunun da 1 milyon 426 min 587 manatını YAP icra katibliyində, şəhər və rayon təşkilatlarında çalışan əməkdaşların əmək haqqı fondu təşkil etmişdir. 324 min 107 manat partiya tədbirlərinin maliyyələşməsinə və ezamiyyət xərclərinə, 33 min 290 manat partiya vəsiqələrinin hazırlanmasına, 190 min 453 manat inventar və dəftərxana ləvazimatlarının alınmasına, 106 min 376 manat cari təmir və özəlləşdirmə xərclərinə, 172 min 89 manat kommunal xərclərə, bank və rabitə xidmətlərinə, 93 min 995 manat avtomobillərə texniki xidmətə, 12 min 428 manat həmkarlar ittifaqlarına ödənişə sərf edilmişdir. Digər xərclər 14 min 851 manat olmuşdur. Partiyanın mərkəzi və yerli təşkilatlarının hesabında 541 min 329 manat qalmışdır.
İclasda, həmçinin İdarə Heyətinin 2010-cu il üçün iş planı təsdiq edilmişdir.