® “PAŞA Qrup” şirkətləri son 3 ayda hansı sosial layihələri həyata keçiriblər?
Ölkənin ən böyük şirkətlər qrupundan olan “PAŞA Qrup” ölkə, əməkdaşlar və cəmiyyət qarşısında öz məsuliyyətini anlayır və müvafiq qaydada davranmağa çalışır. Şirkət öz sosial fəaliyyətinə böyük diqqət ayırır və bu fəaliyyətini cəmiyyət üçün yaratdığı əsas dəyərlərdən biri olaraq görür. Qrupun Korporativ Sosial Məsuliyyət (KSM) fəaliyyətləri çoxşaxəlidir və uşaqlara, xüsusən də aztəminatlı ailələrdən olan uşaqlara dəstək sözügedən fəaliyyətlərin mühüm hissəsini təşkil edir.
Belə ki, davamlı olaraq KSM layihələri reallaşdıran “PAŞA Holding” sentyabr ayında ənənəvi olaraq yeni tədris ili ərəfəsində regionlarda yaşayan aztəminatlı ailələrin şagird adı qazanacaq övladlarına məktəbli dəstinin hədiyyə edilməsi ilə bağlı "Birincilər" layihəsini həyata keçirib. Sosial Xidmət Agentliyinin dəstəyi ilə Bakı, Abşeron-Xızı, Dağlıq -Şirvan, Şirvan-Salyan, Mərkəzi-Aran, Qarabağ, Gəncə-Daşkəsən, Şəki-Zaqatala, Lənkəran-Astara, Mil-Muğan, Quba-Xaçmaz, Qazax-Tovuz rayonunda, eləcə də Naxçıvan Muxtar Respublikasında baş tutmuş xeyriyyə tədbirləri çərçivəsində 11600-dan çox uşağa məktəbli forması dəsti və dərs ləvazimatları, eləcə də məktəbli çantaları təqdim edilib. Ötən ildən etibarən cari layihə çərçivəsində məktəbli ləvazimatları, həmçinin şəhid övladlarına da təqdim edilir.
Bundan əlavə, bu müddət ərzində “Birgə və Sağlam” İctimai Birliyinin təşəbbüsü ilə “PAŞA Holding”in, eləcə də Əmək və Əhalinin Sosial Müdafiəsi Nazirliyi, KOBİA, SOCAR və “Trendyol Azərbaycan”ın dəstəyi ilə ilk inklüziv kafe fəaliyyətə başlayıb. Sözügedən təşəbbüsün məqsədi əlilliyi olan gənc şəxslərin işlə təmin olunmasını dəstəkləmək və onların cəmiyyətə inteqrasiyasını təşviq etməkdir. Üzeyir Hacıbəyli küçəsi 57 ünvanında yerləşən “Kashalata” kafesində ümumilikdə 20 gənc çalışır, onlardan 10-u fiziki məhdudiyyətli şəxslərdir.
Qeyd edək ki, “PAŞA Holding”in törəmə şirkətləri də öz sosial fəaliyyətlərinə böyük diqqət ayırır. Belə ki, Kapital Bank korporativ sosial məsuliyyət sahəsində daha bir addım ataraq həssas qrupdan olan qızların təhsilinə dəstək göstərmək məqsədi ilə yeni təqaüd proqramına start verib. Proqram bir müddət öncə “Kapital Bank” və Azərbaycan Respublikasının Ailə, Qadın və Uşaq Problemləri üzrə Dövlət Komitəsi arasında imzalanan memorandum çərçivəsində həyata keçiriləcək.
Ölkənin birinci korporativ bankı, “PAŞA Bank” isə ADA Universiteti və ADA Universiteti Fondunun birgə təşkilatçılığı ilə Beynəlxalq Əlillər Günü münasibətilə internat tipli məktəblərdə görüşlər keçirib. Layihənin ilk təşəbbüsü əlamətdar günə - 3 Dekabr - Beynəlxalq Əlillər Gününə təsadüf edib. Bu münasibətlə 1 nömrəli ümumi təyinatlı internat tipli ümumtəhsil məktəbində və 11 nömrəli inteqrasiya təlimli internat məktəbində təhsil alan 100-dək şagirdlə görüş keçirilib. 11 nömrəli məktəbdə təhsil alan 6-11 yaşlı şagirdlərin yaradıcı düşüncə tərzini ortaya çıxarmaq, onların özlərini daha səlis şəkildə ifadə etmələrinə dəstək olmaq üçün rəssamlar tərəfindən xüsusi təlim, eləcə də psixoloqların iştirakı ilə xüsusi sessiyalar təşkil edilib. Onlara pis vərdişlərdən uzaq durmağın vacibliyindən, özünə və cəmiyyətə fayda vermək üçün öz üzərlərində çalışmağın və təhsilə, peşəyə yiyələnməyin əhəmiyyətindən bəhs edilib.
Bu dönəm ərzində “PAŞA Sığorta” "Məktəbli" könüllü sağlamlıq sığortasının təşviqi məqsədilə 6-15 yaş arası məktəblilər üçün xüsusi rəsm müsabiqəsi həyata keçirib. Müsabiqədə iştirak üçün 100-dən artıq məktəbli müraciət edib. Uşaqlar mövzuya uyğun olaraq çəkdikləri rəsm əsərlərini “PAŞA Sığorta” şirkətinə göndərib, münsiflər heyəti tərəfindən dəyərləndirilən rəsm əsərləri sərgidə nümayiş edilmək üçün seçilib. Seçilən rəsm əsərlərinin nümayiş edildiyi sərgiyə 30 uşaq valideynləri ilə birlikdə dəvət olunub və hər birində 3 qalib olmaqla 2 fərqli yaş kateqoriyası üzrə qaliblər müəyyən edilib. Sərgi zamanı uşaqlar fərqli oyunlar oynayıb, əyləncəli zaman keçirib və sonda onlara müxtəlif hədiyyələr təqdim edilib.
Bundan əlavə, bir müddət öncə “PAŞA Həyat” Qızıl Aypara Cəmiyyəti ilə əməkdaşlıq çərçivəsində "Mərhəmətli Olmağa Tələsin" layihəsinə sponsorluq edib. Layihə çərçivəsində soyuq qış aylarında isti geyimlərə ehtiyacı olan uşaqlara müxtəlif isti geyimlər təqdim olunub. Bu təşəbbüs aztəminatlı uşaqlara dəstək üçün nəzərdə tutulub.
Qeyd edək ki, dekabr ayında “Bravo” marketlər şəbəkəsi sosial qayğıya ehtiyacı olan uşaqların arzularını gerçəkləşdirmək məqsədilə "ASAN Könüllüləri" Təşkilatının dəstəyi ilə "ASAN Məktub" sosial proqramının birgə əməkdaşlığı ilə “Bir qəlbi də sən isit” aksiyasını həyata keçirir. Belə ki, uşaqların arzularını yazdıqları “ASAN Məktub”lar 20 Yanvar və Koroğlu metro stansiyaları yaxınlığındakı “Bravo” hipermarketlərdə quraşdırılan "Yeni il" stendlərində yerləşdirilib. Qeyd edək ki, “Bravo” hiperlərə yaxınlaşaraq həmin məktublarla tanış ola və uşaqların arzularını həyata keçirməkdə köməklik göstərə bilərsiniz.
Bölmənin digər xəbərləri
