“ HEYDƏR ƏLİYEV VƏ DİLİMİZ, ƏDƏBİYYATIMIZ, TARİXİMİZ” MÖVZUSUNDA RESPUBLİKA ELMİ–NƏZƏRİ KONFRANSI KEÇİRİLMİŞDİR
Aprelin 18- də Azərbaycan Dillər Universitetində “Heydər Əliyev və dilimiz, ədəbiyyatımız, tariximiz” mövzusunda respublika elmi-nəzəri konfransı keçirilmişdir. Təhsil Nazirliyinin və universitetin birgə keçirdikləri konfransda elmi ictimaiyyətin, o cümlədən müxtəlif ali məktəblərin nümayəndələri iştirak etmişlər.
Tədbiri təhsil naziri Misir Mərdanov açmış və “Azərbaycan Prezidentinin təhsilə qayğısı Dillər Universitetinin timsalında” adlı məruzə ilə çıxış etmək üçün sözü Milli Məclisin beynəlxal münasibətlər və parlamentlərarası əlaqələr daimi komissiyasının sədri, universitetin rektoru, Səməd Seyidova vermişdir.
Natiq Heydər Əliyevin hələ 1973- cü ildə- Azərbaycanın rəhbəri olan zaman müstəqil Xarici Dillər İnstitutu yaratdığını, ötən müddət ərzində bu təhsil ocağının müəyyən uğurlar qazandığını qeyd etdikdən sonra demişdir ki, bununla belə, ölkəmizin Prezidenti xarici dillərə artan tələbatı nəzərə alaraq özünün 13 iyun 2000-ci il tarixli Fərmanı ilə keçmiş İnstitutun bazasında Azərbaycan Dillər Universitetini yaratdı. Son 3 ildə burada yeni kafedralar açılmış, nəşriyyat, mətbəə, ”Poliqlot“ qəzeti, “ Elmi əsərlər”, birdəfəlik müdafiə şurası fəaliyyətə başlamışdır...
Təhsil nazirinin müavini, tarix elmləri namizədi İradə Hüseynovanın “ Heydər Əliyev və müstəqil Azərbaycan” mövzusunda məruzəsi də maraqla qarşılanmışdır. O, dövlətimizin rəhbərinin əmək fəaliyyətinə başladığı ilk illərdən respublikamızın müstəqilliyi ideyası ilə yaşadığını, 60- cı illərin sonu - 80-ci illərin əvvəllərində Azərbaycanın müstəqil yaşamasının təmin edilməsinə çalışdığını faktlarla sübut etmişdir.
Natiq vurğulamışdır ki, sovet hakimiyyəti dövründə rəsmi mərasimlərdə ana dilində danışmaq təşəbbüsü ilk dəfə Heydər Əliyev tərəfindən qaldırılmışdır. Sonralar isə böyük müqavimətləri dəf edərək Azərbaycan SSR- in 1978 - ci il Konstitusiyasına Azərbaycan dilinin dövlət dili olması barədə məşhur 73-cü maddənin salınması onun böyük siyasi iradəsinin və gələcək məqsədinin ifadəsi hesab edilməlidir.
Məruzəçi inamla bildirmişdir ki, Heydər Əliyevin Azərbaycana rəhbərlik etdiyi 70- 80- ci illərdə gələcək azadlıq hərəkatının siyasi, iqtisadi, mədəni və mənəvi-psixoloji təməli qoyulmuşdur. Bu görkəmli siyasətçi Moskvada yüksək vəzifədə çalışanda da Azərbaycanla hər zaman əlaqə saxlamış, buradakı hadısələrin gedişi ilə maraqlanmışdır. Təqiblər altında yaşadığı illərdə belə həmişə xalqı ilə birgə olmuş, 90 - cı ilin yanvarında isə həyatı üçün təhlükəyə baxmayaraq Moskvada - Azərbaycanın daimi nümayəndəliyində imperiyanın qanlı cinayətinə qarşı etiraz səsini ucaltmışdır.
Məruzədə həmçinin, dünya şöhrətli siyasətçinin Naxçıvandakı fəaliyyəti təhlil edılmiş,1993- cü ildən sonra ölkədə sabitlik yaradılmasında, iqtisadi islahatların aparılmasında, hüquqi-demokratik dövlət qurulmasında, Azərbaycanın dünya birliyinə inteqrasiya olunmasında, beynəlxalq əlaqələrinin yaradılıb möhkəmləndirilməsində xüsusi rolu geniş işıqlandırılmışdır.
Konfransda Azərbaycan MEA Nizami adına Ədəbiyyat İnstitutunun direktoru, akademik Bəkir Nəbiyevin ”Xalq mənəviyyatının keşiyində” mövzusunda məruzəsi də dinlənilmişdir.
Respublika elmi- nəzəri konfransı öz işini bölmə iclaslarında davam etdirmişdir.
Bölmənin digər xəbərləri
