ABAD-çı: Bir əl işi 10 günə ərsəyə gəlir FOTO VİDEO
Lənkəran, 6 fevral, İlkin Adıyev, AZƏRTAC
Xalq tətbiqi sənətinin qədim növlərindən sayılan ağacoyma sənəti cənub bölgəsində bu gün də uğurla yaşadılır. Lənkəran sakini Samir Həbibov bu qədim sənəti yaşadan ustad sənətkarlardan biridir. Uzun illərdir ata-baba peşəsinə sadiq qalan sənətkar ağacoyma sənətini inkişaf etdirməklə milli mədəni irsimizin qorunmasına və təbliğinə öz töhfəsini verir.
AZƏRTAC-ın bölgə müxbiri xəbər verir ki, Samir Həbibov bu qədim sənətin incəliklərini hələ uşaq yaşlarından atası Etibar Həbibovdan öyrənib. O, əsasən müxtəlif növ ağac materiallarından milli ornamentlərlə bəzədilmiş suvenirlər, dekorativ əşyalar və məişət üçün nəzərdə tutulan əl işləri hazırlayır. Onun əl işləri özünəməxsus dizaynı, incə oyma texnikası və estetik görünüşü ilə seçilir. Sənətkar deyir ki, hər bir məhsulun hazırlanmasında təbii materiallardan istifadə etməyə və milli motivləri qorumağa xüsusi önəm verir.
Samir usta bildirib ki, ağacoyma sənətində yüksəkkeyfiyyətli əl işinin ərsəyə gəlməsi üçün materialın düzgün seçilməsi ən mühüm amildir. O, yaradıcılığında əsasən qoz ağacına üstünlük verdiyini vurğulayıb: “Qoz ağacı həm möhkəm, həm də üzərində işləmək üçün olduqca əlverişli materialdır. Musiqiyə olan sonsuz həvəsim əl işlərimdə də özünü büruzə verir, əsasən tar, kamança, qaval kimi milli musiqi alətlərinin miniatür fiqurlarını hazırlayıram. Bu proses böyük səbir və vaxt tələb etsə də, mənim üçün son dərəcə maraqlı və zövqlüdür”, – deyə sənətkar qeyd edib.
Onun əl işlərində müasirliklə qədimiliyin harmoniyası aydın şəkildə hiss olunur. “Qız qalası” və “Alov qüllələri” mövzusunda hazırladığı əl işləri də bunu deməyə əsas verir.
Bədii oyma sənətinin incəliklərindən bəhs edən usta bildirib ki, bu sahə yüksək dəqiqlik və böyük səbir tələb edən mürəkkəb yaradıcılıq prosesidir: “Bədii oyma insandan təkcə istedad yox, həm də təmkin və rəssamlıq bacarığı tələb edir. Bəzən elə sifarişlər olur ki, orada “buta”, “xətai” kimi milli ornamentlərdən, eləcə də Azərbaycan xalçalarının naxışlarından istifadə etmək zərurəti yaranır. Yeri gəlmişkən, mən əl işlərimdə süni boyalardan istifadə etmirəm. Çalışıram ki, hazırladığım nümunələr ağacın öz təbii rəngini qorusun. Bir əl işinin ərsəyə gəlməsi isə ölçüsündən və mürəkkəbliyindən asılı olaraq, orta hesabla 10 gün vaxt aparır”, – deyə sənətkar vurğulayıb.
Samir Həbibov Masallı şəhərində yerləşən “ASAN həyat” kompleksinin nəzdində fəaliyyət göstərən ABAD – Ailə Biznesinə Asan Dəstək Mərkəzi ilə 2017-ci ildən əməkdaşlıq edir. Sənətkarın hazırladığı suvenirlər Ailə Biznesinə Asan Dəstək Mərkəzinin satış şəbəkəsi vasitəsilə istehlakçılara təqdim olunur.
Sənətkarın sözlərinə görə, ABAD ilə qurulan sıx əməkdaşlıq onun yaradıcılıq fəaliyyətinin genişlənməsində müstəsna rol oynayıb. Samir Həbibov vurğulayıb ki, ABAD tərəfindən göstərilən brendinq, dizayn, qablaşdırma və satış dəstəyi sayəsində onun əl işləri artıq daha geniş alıcı auditoriyasına çatdırılır və bu da ailə büdcəsinə əlavə gəlir gətirir.
Ailə Biznesinə Asan Dəstək Mərkəzinin sənətkarlar üçün yaratdığı imkanları yüksək qiymətləndirən usta bildirib: “Bu platforma dekorativ-tətbiqi sənətdə milli dəyərlərin qorunması ilə yanaşı, fərdi sənətkarların sahibkar kimi formalaşmasına da şərait yaradır. ABAD məni həm marketinq qayğılarından azad edir, həm də gələcək planlarıma daha inamla baxmağa həvəsləndirir”.
İşinin kifayət qədər zəhmətli olmasına baxmayaraq, Samir usta fəaliyyətini daha da böyütmək əzmindədir. O, yaxın gələcəkdə öz emalatxanasını qurmağı, şagirdlər yetişdirməyi və əl işlərini ABAD vasitəsilə xarici bazarlara çıxararaq Azərbaycan mədəniyyətini beynəlxalq səviyyədə təmsil etməyi hədəfləyir.
Bölmənin digər xəbərləri
