ABŞ TƏŞKİLATLARI ŞƏKİDƏ DAHA BİR İCMA LAYİHƏSİ HƏYATA KEÇİRMİŞLƏR
AZƏRTAC-ın müxbiri xəbər verir ki, Beynəlxalq İnkişaf Agentliyinin maliyyələşdirdiyi və CHF təşkilatının yerinə yetirdiyi İcmanın İnkişaf Fəaliyyəti Proqramı çərçivəsində avqustun 4-də Şəki rayonunun Daşüz kəndində yeni transformatorun istismara verilməsi münasibətilə mərasim keçirilmişdir.
Mərasimdə hər iki beynəlxalq təşkilatın nümayəndələri çıxış edərək İcmanın İnkişaf Fəaliyyəti Proqramı çərçivəsində Şəki rayonunda həyata keçirilən layihələr barədə məlumat vermişlər. Bildirilmişdir ki, elektrik transformatoru istifadəyə verildikdən sonra Daşüz icmasında daha bir layihənin həyata keçirilməsinə başlanılacaqdır. İcma sakinlərinin müraciətlərini nəzərə alaraq, USAİD və CHF təşkilatlarının yardımı ilə tezliklə Daşüz kənd orta məktəbinin binasının dam örtüyünün dəyişdirilməsinə başlanılacaqdır. Bu məqsədlə USAİD 7 min ABŞ dolları məbləğində vəsait ayırmış və lazımi tikinti materialları alınmışdır. Tikinti-quraşdırma işlərini isə kənd icması maliyyələşdirəcəkdir.
Tədbirdə çıxış edən Şəki Şəhər İcra Hakimiyyəti başçısının müavini Zərinə Cavadova bildirmişdir ki, işə salınan transformatorun kənd əhalisi üçün iqtisadi səmərəsindən daha çox mənəvi əhəmiyyəti vardır. Bu layihə kənd əhalisinin fəallığının, təşəbbüskarlığının və yaradıcılığının artırılmasına xidmət edir. İcrasına 2005-ci ilin oktyabrında başlanılan bu layihənin həyata keçirilməsində kənd sakinləri fəal iştirak etmişlər. Şəki Şəhər İcra Hakimiyyəti belə layihələri həmişə dəstəkləyir və indən sonra da bu xeyirxah işdə beynəlxalq təşkilatlara daim yardım göstərəcəkdir.
Yeni transformatorun açılışını bildirən rəmzi lent kəsidikdən sonra avadanlığa baxış olmuşdur. Bildirilmişdir ki, 160 kilovat gücündə və dəyəri 5585 ABŞ dolları olan yeni qurğu 50 yaşayış evini elektrik enerjisi ilə fasiləsiz təmin edəcəkdir.
