Bakı, 7 noyabr, AZƏRTAC

Zəfər Gününün ölkəmizin həyatında ən mühüm hadisələrdən biri olması yalnız düşmən üzərində qazandığımız tarixi Qələbə ilə bağlı deyil. Onsuz da Ermənistanın 30 ilə yaxın davam etmiş hərbi təcavüzünə son qoyulması özlüyündə böyük bir salnamədir. Prezident, Müzəffər Ali Baş Komandan İlham Əliyevin rəhbərlik etdiyi rəşadətli Ordumuzun cəmi 44 günə torpaqlarımızın işğalına son qoyaraq bizi tarixi Zəfərimizə çatdırması ilə Azərbaycan həm də beynəlxalq hüququn tələblərini yerinə yetirdi, BMT Təhlükəsizlik Şurasının on illərlə kağız üzərində qalmış qətnamələrini icra etdi. Burada bir məqamı xüsusi vurğulamalıyam ki, qəbul edilmiş qətnamələrin Ermənistanın Azərbaycan ərazilərindən dərhal və qeyd-şərtsiz çıxarılmasını tələb etməsinə baxmayaraq, rəsmi İrəvan nəinki onları icra etmir, əksinə, hər addımda təxribatlara yol verirdi. Deməli, ölkəmizin qazandığı Qələbə özündə həm də beynəlxalq hüququn normalarının yerinə yetirilməsi kimi tarixi hadisəni əks etdirir.

AZƏRTAC xəbər verir ki, bu fikirləri Milli Məclis sədrinin müavini Adil Əliyev söyləyib.

A.Əliyev qeyd edib ki, Ermənistanın xalqımıza qarşı törətdikləri tarixi cinayətlər beynəlxalq ictimaiyyətə yaxşı məlum olmasına baxmayaraq, dünya dövlətləri nəinki ona təzyiq göstərdi, hətta etdiyi bütün özbaşınalıqlara susdu. Münaqişənin nizama salınması məqsədilə ATƏT-dən mandat almış vasitəçilər sülhün və sabitliyin təmin olunmasının təmin etmək, düşmənin hərbi təcavüzünün qarşısını almaq əvəzinə, danışıq prosesinin məntiqi nəticəyə çatmasına da maneə yaradırdılar. Məhz Azərbaycan dövləti lazımi nəticəyə nail olmaq üçün konstruktiv mövqe nümayiş etdirməyə və görüşlərə razılıq verməsinə baxmayaraq, qarşı tərəf prosesi pozur, hər vəchlə sülhün qarşısında əngəl olurdu. Bu gün ölkəmizə qarşı əsassız ittihamlar səsləndirən ABŞ və Fransa isə baş verənləri, sadəcə, izləyir, heç bir əməli addım atmır, Ermənistana təzyiq göstərmirdi. Bu gün açıq-aydın görürük ki, onların münaqişənin nizamlanmasında heç bir marağı olmayıb, hətta müsbət həlli təxirə salmaqla münaqişəni yubadıblar. Onlar münaqişənin həllini uzatmaqla onu qeyri-mümkün etməyə cəhdlər göstəriblər. Danışıqlar prosesi sülhə yaxınlaşdıqda hər dəfə Ermənistan bir bəhanə ilə onu pozdu və müharibədən başqa çıxış yolu qoymadı. Düşmən ölkənin baş nazirinin, digər vəzifəli şəxslərinin təxribatçı bəyanatları, qondarma rejimə səfərləri məhz Azərbaycanın səbir kasasını doldurdu.

“Nəhayət 2020-ci ildə Ermənistanın növbəti genişmiqyaslı təxribatlarının qarşısının alınması məqsədilə Azərbaycan Silahlı Qüvvələri əks-hücum əməliyyatlarına başladı, qısa müddətdə bütün cəbhəboyu istiqamətlərində uğur qazanıldı və tarixi torpaqlarımızın işğaldan azad edilməsinin şahidi olduq. Məhz Müzəffər Ali Baş Komandanın hər gün bizə verdiyi xoş xəbərlər, işğaldan növbəti rayonumuzun, şəhərimizin, kəndimizin azad olunması mesajı xalqımızı sevindirdi.

İkinci Qarabağ müharibəsində xalqımızın yeganə amalı Müzəffər Ali Baş Komandanın “Dəmir yumruğ”u ətrafında sıx birləşmək və düşmən üzərində tam Qələbə qazanmaq idi və məhz belə də oldu. Ömür boyu birgəyaşayışın, tolerantlığın, multikulturalizmin ünvanı olan Azərbaycanda yaşayan, dilindən, dinindən, etnik kimliyindən asılı olmayaraq, bütün xalqların nümayəndələri çiyin-çiyinə döyüş meydanına atıldılar. Xalqımız igidlərimizi birlikdə döyüşlərə yola salıb onları Zəfərlə qarşıladı. Şəhid ailələrinin yalnız “Qələbə!” demələri hərbçilərimizi ruhlandırdı və arxasında xalqın dəstəyini hiss edən qəhrəman hərbçilərimiz misilsiz şücaətlər göstərdilər. Azərbaycan xalqı istər ön cəbhədə, istərsə də arxa cəbhədə Qələbə üçün vuruşurdu. Həm Ordumuz döyüş meydanında düşmənin başını əzir, həm də Müzəffər Ali Baş Komandan həm informasiya müharibəsində bütün təzyiqləri zərərsizləşdirirdi. Həqiqətlərimizin, ölkəmizin haqq səsinin beynəlxalq ictimaiyyətə çatdırılmasında gənclərimiz xüsusilə fəal idilər”, - deyə Milli Məclis sədrinin müavini vurğulayıb.

Adil Əliyev deyib ki, ön cəbhədə qəhrəmanlarımızın göstərdiyi şücaətin misli-bərabəri yox idi. Ermənistan ordusu “Dəmir yumruğ”un qarşısında çox çarəsiz vəziyyətdə qaldı, erməni hərbi qulluqçularının fərarilik etməkdən başqa çıxış yolu qalmadı. Düşmən üzərində tarixi Qələbə qazanıldı və Zəfər yürüşümüz Şuşa zirvəsi ilə tamamlandı. Prezident İlham Əliyevin bu tarixi missiyanı rəhbərlik etdiyi Ordu ilə birgə reallaşdırması nəticəsində həm də ata vəsiyyətini yerinə yetirdi. 2020-ci il noyabrın 8-də Şuşanın işğaldan azad olunması ilə Azərbaycan tarixində ən böyük hadisələrdən biri yaşandı. Döyüş meydanında ağır məğlubiyyətə uğrayan Ermənistanın daha ağır fəlakətdən yeganə çıxış yolu kapitulyasiya aktını imzalamaqdan keçirdi və düşmən bu sənədi imzalamaqla uduzduğunu qəbul etdi.

2020-ci il noyabrın 10-da imzalanmış üçtərəfli Bəyanatla ölkəmizin qazandığı tarixi Qələbə bir daha təsdiqləndi. Nəticə etibarilə Ermənistan məğlubiyyət sənədinə imza ataraq, qısa zaman kəsiyində digər şəhər və rayonlarımızdan çıxması barədə öhdəlik götürdü. Beləliklə, uzun illər işğal altında qalan Ağdam, Kəlbəcər və Laçın rayonları bir güllə atılmadan Azərbaycana təhvil verildi. Bu, ölkəmizin döyüş meydanında qazandığı qələbənin diplomatik müstəvidə davamı idi.

“Dövlətimizin başçısının hərbi əməliyyatlar bitdikdən dərhal sonra işğaldan azad olunmuş ərazilərə səfərləri ilə genişmiqyaslı abadlıq-quruculuq işlərinə başlanıldı. Zəfər yolu salındı, Füzulidə və Zəngilanda beynəlxalq hava limanları tikilib istifadəyə verildi, işğaldan azad olunmuş ərazilərdə müasir infrastruktur quruldu və genişmiqyaslı işlər bu gün sürətlə davam edir. Yalnız bir faktı demək kifayətdir ki, işğaldan azad olunmuş ərazilərdə bir dənə də istifadəyə yararlı bina yox idi, daş üzərində daş qalmamışdı. İşğaldan sonra və bu gün Füzuliyə səfər edən xarici qonaqlar, jurnalistlər qısa müddətdə görülən işləri heyrətlə izləyirlər. Artıq işğaldan azad olunmuş ərazilərimizə həyat qayıdıb, məcburi köçkünlər 30 ildən sonra öz evlərindədilər. Böyük Qayıdış Konsepsiyası uğurla reallaşır, dövlət tərəfindən evlər, təhsil müəssisələri, xəstəxanalar inşa olunur və geri qayıdan vətəndaşların rahatlığı üçün bütün imkanlar yaradılır. Onların təhsil, məşğulluq məsələlərinin həlli istiqamətində görülən işlər öz bəhrəsini verir.

Əsas məsələlərdən biri də şəhid ailələrinə və qazilərə dövlətimiz tərəfindən göstərilən yüksək diqqət və qayğıdır. Bizə tarixi Qələbəmizi bəxş edən şəhidlərimizin ailə üzvləri və qazilərimiz dövlət tərəfindən mənzillərlə, qazilərimiz, həmçinin nəqliyyat vasitələri ilə təmin edilir.

Bu il Zəfər Gününü daha əlamətdar edən hadisə isə sentyabrın 19-20-də həyata keçirilən lokal xarakterli antiterror tədbirləridir. Məhz bu tədbirlər nəticəsində ölkəmizin ərazi bütövlüyü və suverenliyi tam bərqərar olundu. Prezident, Müzəffər Ali Baş Komandanın Xocalıda, Xankəndidə üçrəngli bayrağımızı qaldırmaqla tarixi missiyanı tamamlamış oldu.

İndi isə Qarabağ və Şərqi Zəngəzur dirçəlir, xalqımızın öz torpaqlarına geri dönməsi ilə o ərazilərə həyat gəlir”, - deyə A.Əliyev vurğulayıb.

Milli Məclis sədrinin müavini xalqımıza tarixi Qələbə bəxş etmiş şəhidlərimizin əziz xatirəsini dərin hörmət və ehtiramla anıb, qazilərə şəfa diləyib.