AĞCABƏDİDƏ BÜTÜN SAHƏLƏRDƏ İRƏLİLƏYİŞ VARDIR
AZƏRTAC-ın müxbiri xəbər verir ki, Ağcabədi rayonunda ötən ilin yekunlarına, 2007-ci ildə qarşıda duran vəzifələrə həsr olunmuş yığıncaq keçirilmiş, rayon icra hakimiyyətinin başçısı Şahin Məmmədovun hesabat məruzəsi dinlənilib müzakirə edilmişdir.
Qeyd olunmuşdur ki, Prezident İlham Əliyevin respublikada infrastrukturun yenidən qurulması və inkişaf etdirilməsi sahəsində apardığı məqsədyönlü siyasət Ağcabədi rayonunda da uğurla həyata keçirilir. Son bir ildə rayonda 5 milyon manatlıq tikinti-abadlıq işləri görülmüşdür. Ümummilli liderimiz Heydər Əliyevin adını daşıyan prospekt yenidən qurulmuş, burada ulu öndərin əzəmətli heykəli ucaldılmışdır. Hazırda ulu öndər Heydər Əliyevin adını daşıyan muzey binasının inşasında tamamlama işləri aparılır. Şəhərdaxili küçələrə 135 min 500 kvadratmetr asfalt salınmış, 80 min ədəd ağac əkilmiş, yeni səkilər salınmış, köhnələri təmir olunmuş, küçə, meydan və parklara üzlük daş döşənmiş, yağış sularının axıdılması üçün 12 min metr yerüstü kanalizasiya xətti çəkilmiş, 700-ə yaxın köhnə və yararsız obyekt sökülmüş, yerində müasir üslubda 350 yeni obyekt inşa olunmuşdur.
Bildirilmişdir ki, respublikamızın ən böyük kənd təsərrüfatı rayonu olan Ağcabədidə hər il yüksək taxıl, pambıq, bostan-tərəvəz, yem bitkiləri məhsulu götürülür. Ötən il də rayonun torpaq mülkiyyətçiləri, fermerləri üçün uğurlu olmuş, nəzərdə tutulduğundan xeyli çox məhsul istehsal edilmişdir. Qaramalın baş sayı 81.087-yə çatdırılmış, davarın sayı 684 baş artmışdır. 200 kilometr kollektor və suvarma kanalı lildən təmizlənmiş, 4 subartezian quyusu istifadəyə verilmişdir.
Ötən il təhsil, səhiyyə, mədəniyyət, rabitə və sosial obyektlərin tikintisi diqqət mərkəzində saxlanılmışdır. Heydər Əliyev Fondunun təşəbbüsü ilə 5 məktəb binası tikilmişdir. Dövlət Proqramına uyğun olaraq, şəhər 4 nömrəli orta məktəb üçün 360 yerlik yeni bina tikilmiş, şəhər 9 nömrəli orta məktəb əsaslı təmir olunmuşdur. Hazırda Kürdlər kəndində 360 yerlik, Boyat kəndində 500 yerlik yeni məktəb binaları inşa olunur.
Rayon mərkəzində Qarabağ müharibəsi əlilləri və şəhid ailələri üçün üçmərtəbəli 24 mənzilli yaşayış binasında tamamlama işləri aparılır. Şəhidlər xiyabanından 20 Yanvar şəhidlərinə abidə kompleksi ucaldılmış, rabitə evində əsaslı təmir və yenidənqurma işləri aparılmış, 3510 kilovoltluq yeni yardımçı stansiya, Hindarx kəndində dəyəri 80 min manat olan ticarət mərkəzi tikilib istifadəyə verilmişdir.
Regionların sosial-iqtisadi inkişafı Dövlət Proqramına uyğun olaraq yeni istehsalat sahələri yaradılmış, 2 kiçik süd emalı sexi fəaliyyətə başlamışdır. Ötən il ümumi məhsul istehsalı əvvəlki ilə nisbətən 9,7 faiz, sənaye məhsulunun həcmi isə 24 faiz artmışdır. Əhalinin elektrik enerjisi, içməli su, təbii qazla təminatı üçün tədbirlər görülmüş, bu il rayona təbii qaz çəkilişinə başlanmışdır.
Yığıncaqda çıxış edənlər əldə olunmuş nailiyyətlərlə yanaşı, həlli vacib problemlərdən də söhbət açmış, sosial-iqtisadi inkişafın daha da sürətləndirilməsinə dair təkliflərini vermiş, ölkə Prezidenti İlham Əliyevin apardığı daxili və xarici siyasəti ürəkdən bəyəndiklərini bildirmişlər.
Yığıncaqda Azərbaycan Respublikası Prezidentinin İcra Aparatının regional idarəetmə və yerli özünüidarəetmə orqanları ilə iş şöbəsinin müdiri Zeynal Nağdəliyev çıxış etmişdir.
Azərbaycan Respublikasının Prezidenti İlham Əliyevə müraciət qəbul olunmuşdur.
Hesabat yığıncağında Milli Məclisin deputatları Tahir Rzayev və Aqil Abbas iştirak etmişlər.
Bölmənin digər xəbərləri
