Fransada magistral avtomobil yollarına nəzarət üçün dronlar sınaqdan keçirilir
Paris, 11 iyun, AZƏRTAC
Fransada təhlükəsizliyin gücləndirilməsi məqsədilə magistral avtomobil yollarda müşahidə dronlarının istifadəsi üzrə yeni sınaqlar aparılır. Ölkənin Tuluz şəhərində yerləşən “Delair” şirkəti tərəfindən hazırlanan pilotsuz uçuş aparatı A88 avtomagistralında real şəraitdə test edilib.
AZƏRTAC xəbər verir ki, 5 metr qanad açıqlığına və 25 kiloqram çəkiyə malik olan dron təxminən 3 saat 15 dəqiqə havada qala bilir. Həmin dronlar yüksəkdəqiqlikli və infraqırmızı kameralarla təchiz olunub. Sınaq zamanı gecə saatlarında yol kənarında olan bir şəxsin hərəkətləri dron vasitəsilə aydın şəkildə izlənilib.
Sistem əvvəlcədən proqramlaşdırılmış marşrut üzrə uçur və görüntüləri real vaxt rejimində idarəetmə mərkəzinə ötürür. Dronlar yanğın, qəza və ya digər fövqəladə halların operativ qiymətləndirilməsinə imkan verir və lazımi tədbirlərin daha sürətli görülməsini təmin edir.
Bu texnologiyadan artıq Dəmir Yolları Milli Şirkəti tərəfindən dəmir yolu şəbəkəsində relslərin və infrastrukturun qorunması üçün istifadə olunur.
Mütəxəssislərin fikrincə, magistral yollarda da dronlardan istifadə patrul xidmətlərinin işini asanlaşdıracaq, hadisələrə reaksiyanı sürətləndirəcək və əməkdaşların təhlükəsizliyini artıracaq.
Bölmənin digər xəbərləri
