Ağcabədinin iki kəndinin elektrik şəbəkəsi yenidən qurulur
Bakı, 3 mart, AZƏRTAC
Ağcabədinin Pərioğullar və Hacıbədəlli kəndlərinin elektrik şəbəkəsi yenidən qurulur.
“Azərişıq” ASC-dən AZƏRTAC-a bildirilib ki, Prezident İlham Əliyevin müvafiq tapşırıqlarına əsasən, qurum tərəfindən həyata keçirilən investisiya layihəsi çərçivəsində Pərioğullar və Hacıbədəlli kəndlərinin elektrik şəbəkəsi yenilənir. Yenidənqurma nəticəsində 396 abonenti olan Pərioğullar kəndində 4 ədəd komplekt transformator məntəqəsi quraşdırılacaq, 12 kilometrə yaxın 10 kV-luq, 28 kilometrdən çox 0,4 kV-luq elektrik xətti yenilənəcək.
Ağcabədinin Hacıbədəlli kəndində də yenilənmə işləri davam etdirilir. 843 abonenti olan kənd ərazisində 9 ədəd komplekt transformator məntəqəsi quraşdırılacaq, 22 kilometrə yaxın 10 kV-luq, 32 kilometrdən artıq 0,4 kV-luq elektrik xətti dəyişdiriləcək. Hər iki kənddə elektrik sayğacları yenisi ilə əvəz olunacaq. Pərioğullar və Hacıbədəlli kəndində işlərin yekunlaşması ilə 1300-ə yaxın abonent keyfiyyətli və dayanıqlı elektrik enerjisi ilə təchiz ediləcək.
İnvestisiya layihəsinin birinci mərhələsində Ağcabədinin Mehrablı, Ağabəyli, Cəfərbəyli, Şənlik və Qaradolaq kəndlərinin elektrik şəbəkəsi yenidən qurulub. İnvestisiya layihəsi bütün regionlarda 100-dən çox kəndi əhatə edir.
Bölmənin digər xəbərləri
